渡輪千味屋 (Closed)

平日時時都有幫襯5號碼頭小食店，多數係飲品，因為佢賣得超平，冰凍樽裝水、盒裝、罐裝飲品都只賣$3，仲平過超市！有時肚餓亦會買D魚蛋，燒賣等小食醫肚。今日機緣巧合要坐一點九船返長洲，終於有機會一試佢D車仔麵。一如其他車仔麵，種類繁多，任君選擇，$30已經有麵或粉同三款餸，另每加一款餸加$5。價錢合理，味道不錯，本來並不值得一提。我要了米粉，蘿蔔、牛腩、冬菇同魚蛋，而米粉內已經有些少青菜，不錯。當我食到冬菇就覺得可以推介。冬菇中等size，唔算好大隻，但每一隻肉身都好厚，係我食過車仔麵以來最厚嘅，炆得焾而且入味，好滑但又不失爽口，所以忍唔住要介紹吓！有機會可以一試！