稻埕飯店 (V Point) (Closed)

之前幫襯稻埕情嘅尖沙咀店，猶記得佢嘅出品富特色之餘亦都令人相當滿意，今日嚟到銅鑼灣又嚟試下佢嘅新分店。鵝不是鴨肉，鵝肉滷得入味，散發著淡淡嘅鹵水清香，配菜醃蘿蔔條酸酸甜甜，加埋隨附嘅甜不辣醬，充滿台式嘅風味。香煎北海道帶子配鮮露筍，煎帶子由機械人送上，感覺新鮮，帶子賣相精緻，好似一粒粒獨立包裝咁樣，煎香咗嘅半熟帶子面頭係香蔥、炸蒜同XO醬等等香口嘅材料，配菜有鮮蘆筍同炸蓮藕片，精緻得嚟亦相當好味。四寶滷肉飯，滷肉飯味道正宗，令人有如置身台灣夜市，上面嘅半熟流心蛋蛋味香濃，入味嘅程度絕不比滷鴨肉輸蝕。紅棗杞子桂圓米水，呢度有個好特別嘅米水系列，配襯米水嘅都係一啲好滋潤嘅材料，米味同紅棗杞子桂圓嘅味道相當平衡，多飲有益。