Indian Masala Thighs (+$10)
少少辣，充滿着印度香料亦都有少少煙燻嘅氣息，雞件都醃得非常入味。雞肉唔算太多汁但係一啲都唔乾。共有三大件，好食又相當抵食。
Margherita 9"
一心嚟就係食呢度嘅pizza。每次都係簡簡單單想食Margarita。蕃茄醬芝士羅勒嘅香味互相緊扣，份量亦都控制得剛剛好。薄薄嘅Pizza咬落topping非常juice，餅底亦都非常可口。佢個麵餅本身亦都充滿筋性。好味。
Meat Lasagna (+$10)
今日這個千層麵有點失色。雖然佢嘅芝士依然香厚軟綿綿。肉嘅份量亦都相當慷慨。但係今日這個千層麵有啲煮過淋，肉醬雖然多但係冇乜肉味。如果佢可以落多啲牛肉碎落去肉醬入面就會更加香濃。雖然不至於唔好味，但只能說不過不失。
第一次喺餐廳見到佢有二人及四人晚餐嘅選擇。埋單$339其實係幾抵食嘅。今日星期日晚上人客亦都係唔多。覺得佢哋嘅經營亦都不容易。希望佢哋捱得住撐落去。用佢哋這裏薄餅嘅質素而言，同區應該算是第一。這裏仍然係我會推薦的。
