一生懸麵

依間一生懸麵其實都食過幾次,比起拉麵我更鐘意佢哋嘅沾麵。麵可以揀冷熱同埋硬度,沾麵嘅湯味道夠濃,咸淡度亦適中。

特濃豚骨沾麵湯底濃厚,配菜方面亦有大量筍片,最值得一讚係佢哋嘅豚肉,經過火炙後帶有炭香,為豚肉添加多一番風味。

期間限定嘅檸檬柚子沾麵更令我有驚喜,除咗沾麵外,仲有滿滿嘅蔬菜,感覺更健康,沾麵湯底散發柚子清香,味道清新。

小食方面亦選擇咗雞軟骨棒,一份有2件,軟淋嘅雞肉加上雞軟骨粒,有口感,係一款唔錯嘅小食。