發哥粥底海鮮火鍋 (Closed)

今日喺九龍灣附近工作，見到附近開左間主打粥底海鮮火鍋既餐廳，就同同事過黎試下先。呢度共有兩個套餐可以選擇。如果兩個人黎，大家可以自己選擇想嗌邊款餐，即可以一個人嗌$198，另一個嗌$258。不過我同同事今日都想食龍蝦，就嗌左$258個一set🤤三文魚刺身，不過不失。店員首先會奉上海鮮盤。龍蝦肥美厚肉，肉質彈牙，仲有蝦膏食落更香口。鮑魚幾新鮮。貴妃蚌一樣係肥美，不過又唔算特別鮮甜。魚比較多骨，肉質滑嫩，蘸上醬油更好食。套餐包括肥牛，以及八款配料，肯定食得飽。當中我最欣賞手打墨魚丸，彈牙之餘，味道亦相當唔錯。 最後可以開始煮粥啦！粥底比想像中更鮮甜，不過我建議要早少少落煮粥既配料，否則啲配料會太硬，不夠軟稔。整體黎講，食物份量十足，海鮮都新鮮，配料選擇豐富，但冇乜驚喜，路過可以一試。