龍記軒

Open Now

Now Closed

話說上次就食咗龍記蛋卷嘅原味，食完之後，雖然就覺得甜咗少少，但個口感真係好好，所以就想試吓佢嘅咖啡味蛋卷，睇吓係咪都係咁好食。攀山涉水由將軍澳搭屯馬線去到屯門，來來回回經歷咗成百幾公里。打開個蛋卷盒面頭第一個蓋，啲咖啡味已經散發出嚟，好香咖啡味，搞到我都未開過蓋先興奮。好可惜，期望越大，反差越大。呢隻蛋卷嘅口感依舊，但係個味道就真係唔得。聞落嘅香味遠比食落嘅香味重，感覺就有啲似好平好平嗰隻即沖雀巢咖啡，一蚊包嗰隻，你沖完之後，咖啡嘅香味散發出黎可以令到成個Office都好香，但飲落就平平無奇。呢隻蛋卷都係一樣，如果用平平無奇黎形容佢，其實都幾客氣。真心講句，如果我第一次食依個牌子嘅蛋卷係食依隻味，我很肯定唔會翻兜。佢嘅味道係炒燶咗嘅咖啡味，你調轉個角度諗，可能佢係想sell炭燒咖啡味呢，但好可惜，我食落仲係有啲苦澀嘅味道，可能咖啡係咁嘅味？唉。想點呀，山長水又遠，俾啲咁嘅質素我，失望，我都係食返德成號算。仲有成盒點算，唉。Mcmug綜合評分：2/10，兩分係比個口感，因為真係足料。