前菜：雞絲粉皮
麻醬超級香！花生醬同芝麻醬嘅比例調教得十分好，兩者嘅香味唔會互搶。雞絲肉嫩滑，粉皮唔會好厚，粉味唔重，配合混醬一齊食，正！
點心：上海小籠包
小籠包係必點啦，翡翠嘅小籠包係正常發揮啦，係佢哋嘅配料比較特別，一般都係俾薑絲，而佢係俾薑蓉。個人覺得呢個細位唔錯，薑蓉比薑絲更細微，小籠包嘅湯汁唔會被薑絲搶味而同時提鮮！
小菜(一）：椒麻酸菜魚
呢到嘅酸辣味都唔算叫好重，口味係比較適合大眾嘅酸辣度。魚片冇咩骨，食落都好滑，但酸菜就麻麻地。呢到嘅酸菜魚係近似傳統版嘅酸菜魚，個湯比較偏重油，重蒜，但整體不過不失。
小菜（二）：糖醋雞球
非常推薦呢道菜！酸酸甜甜咁好開胃，而且最重要係用雞球唔會外面成層粉漿，啖啖肉。本身豬肉嘅口感比雞肉硬身，而且脂肪含量都比較高，用雞肉代替咗豬肉，呢個做法可以提升口感之餘，仲可以食得更健康。
主食：五香牛肉拉麵
湯底係清雞湯，拉麵係軟硬適中，牛肉覺得偏鹹咗少少，但夠入味，兩者一齊食，味道都可以中和下。
飲品就叫咗一杯凍豆漿同一杯檸檬薏米水。
整體而言，成個餐兩個人食都好夠，埋單都係每人$180左右。呢個餐都係一個冇優惠卷下，有匯豐信用卡嘅朋友仔其中一個唔錯嘅選擇。
