三個女仔難得夾岩日子，想揾個係尖沙咀有得食又有得飲嘅地方，見呢間全部都係正評，每個食評都係讚，睇食物相都幾吸引，所以就提早一日係openrice訂位。
位置其實就係李家附近。原來佢實際真係一間酒吧 有埋食物提供。我地9:05pm去到，老闆好主動咁俾咗張happy hour嘅生啤list我地 買一送一，原來happy hour係5-9pm，但佢都唔計較照做俾我地，第一樣野已經加咗分。
不過最後揀咗tower $280，因為個waiter計埋數俾我地睇話三個人叫tower係扺過買一送一，咁就信佢啦。
雞泡魚乾 $8x，真係即燒 拎上手仲係熱，而且份量都唔少，表面少少蜜糖甜味 咬落去又好香，一流嘅佐酒小食 會令人停唔到口，不過唔明點解係配沙律醬黎食。。。
1
德國腸(半份) $12x，半份都勁大碟 兩條大四條細，三個人完全食唔哂！不過要提醒下就係，兩條大腸都係黑椒味 真心辣。好彩有炸薯仔補救下，好脆 調味適中 不經又覺食咗好多。
韓式炸雞(兩拼) $14x，呢個真係推薦！百幾蚊食到全隻嘅炸雞 仲要係有質素同大大隻！係同區求其揾間都起碼要$2xx。佢個原味炸雞真係好食到不得了，味道岩岩好 好脆 入面仲有汁。另一半甜辣味都有驚喜嘅，佢個甜同辣做得好平衡 冇搶味。不過就建議唔係好食得辣嘅朋友 唔好叫辣味，因為都真係幾辣架，但d雞肉真係好味到唔食唔得。
1
年糕餃子雞蛋湯$9x，一上呢個湯 大家都嘩咗一聲，因為個蛋花整得好滑好靚，再飲啖湯 好鍾意 有清，之後發現餃子點解係圓形嘅 好似粒湯圓，咬開先知佢真係餃子，我都好鍾意呢個做法 皮又薄 又易入口。
三個人 叫咗酒 四樣野食，埋單每人$280，其實價錢真係算平，仲要食唔哂。最緊要係坐得耐同舒服，基本上全部都係梳化位，每個位置嘅空間好大。
