Sweet Secrets (Closed)

5月10日，本來打算買個蛋糕賀母親節，於是早上11點15分去到Sweet Secret銅鑼灣店，點知去到成間鋪黑晒落晒簾，好明顯冇人！我仲怕我太早未開門，點知一睇門口掛住個牌，寫住銅鑼灣店星期六開11:00 am - 8:30 pm，於是我打電話去中環店，有人聽，話我知：「同事响附近就到」。於是我問佢我要等幾耐，佢都答唔到我，當時時代附近又熱又沙塵滾滾，我唯有走人。好明顯，店員係遲到。我唔係因為店員遲到而嬲，只係我認為我作為一個客，需要一個合理嘅解釋，就算佢話當值同事果朝病咗所以臨時搵人頂而遲我都會接受，我後來亦到訪過佢嘅Facebook見到佢哋開始接唔到更多母親節蛋糕訂單，但我仍然寫咗e-mail去info同enquiry問，過咗十日我仲未收到回覆，我理解為佢哋唔會回覆，對於呢件事，以及佢哋放棄呢個解釋同retain客人嘅機會，我感到相當遺憾。遺憾嘅係，我的確曾經覺得Sweet Secret係唔錯嘅蛋糕店，亦曾留下過一啲好嘅回憶。我唔會再幫襯了，謹此希望各位下次訂蛋糕唔會有嘅遭遇，反正買甜點食，最終目的都係求開心。