呢到雖然叫大排檔，但其實裝修好靚，都好乾淨，唔會坐到好唔舒服。
首先就有呢個黃金蛋黃炸魚皮。塊塊魚皮都勁大塊，每一塊都有勁多蛋黃碎，明明應該好漏既食物都可以食兩三塊
呢個係酥炸黑松露菌醬芝士乒乓波，其實係一個流心嘅牛丸，用嚟裝呢個牛丸嘅器皿都好靚！而且每粒牛丸都勁大粒仲要有食八粒咁多非常抵食
食嘅時候要好小心因為啲爆漿係咁流出嚟
但係真係好香濃嘅黑松露味鍾意黑松露嘅人千祈唔可以錯過！！不過呢個就覺得有啲漏啦！
呢個就係去到大排檔必食嘅豉椒炒蜆。不過不失亦都有鑊氣唔會太多沙
呢個就係豉椒鵝腸。味道方面其實同豉椒炒蜆係一樣嘅，不過食鵝腸就係要食佢嘅爽脆，而呢到每一條腸都大大條亦非常之爽脆
最後要介紹嘅就係冇得彈嘅海山骨亦即係蝦醬炸排骨！黎嘅時候見到一層厚厚嘅肥膏就覺得會唔會好油好難食呢
但係又聞落去超香嘅蝦醬味
食落先知係完全唔會好油！佢將啲脂肪都炸到好爽，而且蝦醬味係會留係個口入邊好耐🤤🤤而佢都唔會炸到啲肉乾爭爭，蝦醬味配落酥脆嘅排骨非常之好食！！亦都已決定係我媽咪生日嘅時候帶佢過嚟食！！
其實最後佢仲會每人送一個番薯糖水，不過由於我哋實在太飽啦所以亦都冇食到番薯糖水
非常之多謝朋友嘅介紹！呢一間絕對值得一而再再二三咁過嚟食
