Video
Read full review
2012-08-09
372 views
呢間酒樓第一次係度食晚飯, 因為媽咪生日, 所以喺屋企附近搵間酒樓食飯. 今晚我地一行十幾人(當中有10個大人, 4個小朋友, 1個BB)黎到食飯, 本來都冇咩特別, 只係覺得有D奇, 七八點時間, 竟然呢間酒樓無咩客, 雖然有三層啫, 但人客唔算多. 直到食完飯,我知點解呢間酒樓冇咩生意啦!由於我們較多人, 每人點一兩個小菜, 為免錯漏, 所以用紙寫了所點的小菜, 然後叫一個伙記過黎落單, 該名伙記將我地點既菜, 寫晒落單之後, 亦有同我地覆一次所點的小菜有冇錯漏. 呢間酒樓而家係同渣打做既PROMOTE, ORDER 某一D食物會半價, 又或者係D套餐特價. 落單時伙記冇同我地講而家佢地係做緊渣打信用咭優惠, 如果有呢張信用咭, 可以點佢地推廣既小菜. , 我地亦冇刻意提我會用渣打埋單, 因為宣傳單上冇寫明必須落單時聲明.同埋一般黎講, 只要出示正在推廣既信用咭埋單, 呢張信用咭既優惠你係可以享受到既.到上菜時, 已有一個女部長, 唔小心倒咗D湯落個坐位到, 好在當時我屋企人啱啱行開, 如果唔係就倒落佢度. 咁你倒瀉野係我個位度, 正常我都會望望, 但係呢個女部長真係不知所謂,
呢間酒樓第一次係度食晚飯, 因為媽咪生日, 所以喺屋企附近搵間酒樓食飯. 今晚我地一行十幾人(當中有10個大人, 4個小朋友, 1個BB)黎到食飯, 本來都冇咩特別, 只係覺得有D奇, 七八點時間, 竟然呢間酒樓無咩客, 雖然有三層啫, 但人客唔算多. 直到食完飯,我知點解呢間酒樓冇咩生意啦!
由於我們較多人, 每人點一兩個小菜, 為免錯漏, 所以用紙寫了所點的小菜, 然後叫一個伙記過黎落單, 該名伙記將我地點既菜, 寫晒落單之後, 亦有同我地覆一次所點的小菜有冇錯漏. 呢間酒樓而家係同渣打做既PROMOTE, ORDER 某一D食物會半價, 又或者係D套餐特價. 落單時伙記冇同我地講而家佢地係做緊渣打信用咭優惠, 如果有呢張信用咭, 可以點佢地推廣既小菜. , 我地亦冇刻意提我會用渣打埋單, 因為宣傳單上冇寫明必須落單時聲明.同埋一般黎講, 只要出示正在推廣既信用咭埋單, 呢張信用咭既優惠你係可以享受到既.
到上菜時, 已有一個女部長, 唔小心倒咗D湯落個坐位到, 好在當時我屋企人啱啱行開, 如果唔係就倒落佢度. 咁你倒瀉野係我個位度, 正常我都會望望, 但係呢個女部長真係不知所謂, 我望吓係咪真係倒咗落張櫈度, 諗住抺返去, 但張枱布阻住咗視線, 好自然撥開張枱布去望啦, 呢個咁既女部長, 即刻咀"秒秒", 係度啤住我, 跟住佢係枱面拎咗張餐巾抺咗兩吓,然後將塊餐巾"pat"係枱面, 你呢d咁既態度, 我已經唔出聲, 家陣係你倒瀉野, 我望吓都唔得?? 跟住第二度菜要上台, 我只係再望吓抺乾淨未? 因為我屋企人要坐架嘛, 頂, 佢見我望, 即時再啤我兩眼, 再侮氣D抺咗兩野, 走咗去. 呢D係咩態度呀? 好! 我算, 因為媽咪生日, 唔同你呢D人一般見識!
我地今日點咗隻片皮鴨兩食既, 但係份炒鴨絲遲遲未到, 台上個十幾樣餸已經清晒, 只係爭個碟炒鴨絲, 叫呢個冇禮貌既女部長去跟跟單, 結果佢又唔多願意咁去CHECK CHECK單. 我估係漏咗單, 見呢個女部長又同個經理傾咗幾句, 又走咗去入機. 結果又等多兩三個字, 個碟炒鴨絲終於上枱啦! 由於已經九點半啦, 等呢碟都真係等得太耐, 大家咩都食晒. 我地就順便叫另一個伙記上埋d生果啦, 因諗住食埋生果就埋單走人. 去到呢個時候, 我都只係覺得係個女部長冇禮貌, 食物一般. 雖然小菜價錢一D都唔平, 但未有想過唔會再黎呢間酒樓
由於我地訂枱時話有17人, 所以一坐低張單已經係劃咗17個茶位, 咁埋單時咪同呢個極品女部長講改返茶位, 佢望吓我地, 係度數數人頭, 然後話D小朋友全部都要計架, 當中除咗手抱嗰個BB, 最細嗰個都未夠3歲, 佢話要計, 我地都話咁你咪計囉, 你幫我改返人數茶位就得, 然後就話你地15人, 我地當時大家都愕然, 15人?? 連BB都計?? 叫佢自己再數清楚, 得14人, 一個手抱BB. 佢至話咁14人啦!
跟手我地叫佢埋單, 我地話有渣打信用咭, 隻燒鵝應該係半價, 佢話佢唔知. 佢話佢要CHECK吓單,如果用到就用啦! 跟住返黎就話, 你落單時冇講係用渣打信用咭優惠,所以冇優惠! 我地問佢, 咁你改唔到單咩? 呢張宣傳單都冇講要落單時聲明. 佢就一味話改唔到單. 又話佢唔知道, 仲好笑係問, 你地落單時, 有冇拎住渣打個份宣傳單指住話落呢度呢隻燒鵝! 我地咪問佢, 你呢度d人冇同我講要用咩優惠要出聲,份野又冇講明要落單前聲明. 仲要你話唔係我落單, 我唔知. 既然係咁, 佢又話唔到事, 咩都話唔知, 我地咪叫佢叫部長黎囉! 跟住佢幾寸咁話我就係部長 咁我地就話咁你叫經理黎啦! 佢走去個經理度講咗幾句, 跟住經埋就理都唔理, 叫佢去搵返落單既人黎同我地講. 個刻已經覺得個經理都唔係路, 個客話要搵你, 你可以唔黎, 叫第二個伙記黎.咩服務態度??
好啦, 負責落單既伙記終於出現啦, 佢一出現就話小姐你地搵張紙寫俾我要咩小菜, 我寫完有同你地覆d小菜啱唔啱架喎, 你又冇拎住份宣傳單黎落單, 我唔知你要用優惠喎! 我話咁你有冇講用優惠要出聲呀?你份宣傳單有冇寫明呀?? 跟住仲話我唔俾機會佢解釋. 好我俾機會你講, 結果俾你講多次都係講番個兩句, 仲話我地冇講佢就入個冇優惠既code. 咁我地又問返佢我地唔係寫code俾你, 亦唔知你有兩個code, 咁而家係咪唔可以有呢個優惠呀? 佢仍然答你地落單時冇講, 唔係佢落錯. 因為我地同d伙記嘈得幾犀利, 基本上成個廳d食客都聽見, 個個都望住. 係呢個時候, 個經理仍然當自己係聾, 係盲. 嘈成咁仲係企係收銀度唔知做咩. 既然個經理咁懶皮, d伙記又係咁懶皮. 我地亦唯有照樣懶皮啦, 同個伙記講, 我唔會埋呢張單, 你去報警啦! 與此同時有個食客應該又係食完一肚火咁走, 行黎我地張枱附近大聲話, 呢間垃圾黎架, 以後都唔使再黎幫襯呀! 正一垃圾, 跟住就向住門口方向走!
由於我地話唔埋單, 個伙記最終又係要走去個經理度講, 大大聲聲話佢地而家話唔埋單, 叫我地報警喎, 到呢個時候個經理冇得繼續裝聾扮盲. 死死地氣咁行黎話有咩幫到我地. 結果又再講多次. 佢依然覺得佢無錯格, 然後又再講一大堆廢話, 下刪一百字, 因內容都係個d, 話我地冇拎份menu同佢地落單, 唔指住要用呢個優惠喎!最後仲問我地想點, 我地咪就係想要有呢個優惠囉, 結果佢咪死死地氣話咁我幫你地去改返啦!
呢d咁既酒樓, 大大間集團, 但係小小事都要d食客嘈成咁至做野! 服務態度又差. 邊有食客會返轉頭架, 野食又一般. 所以我地成家都決定唔會再幫襯呢間咁既酒樓, 食餐飯要咁受氣! 如果佢地想繼續做落去, 我諗佢應該要正視一下員工質素, 服務態度.
Other Info. :
其實早兩三年, 我係同一集團新浦崗分店食晚飯時, 遇到另一件事, 當時又係有信用咭優惠. 同樣地叫咗隻佢地出名既燒鵝. 雖然上枱係有一大隻燒鵝, 但呢碟燒鵝竟然係一半燒鵝, 一半燒鴨. 單憑外表其實你好難分到佢係鵝定鴨, 但當你食入口, 總會發現有少少分別. 至抵死係表面全部係係鵝, 底就全會部係鴨, 你都食左一半, 點樣去同酒樓講入面個d係鴨唔係鵝呢? 仲有呢d要食入口至會發現有分別. 如果唔係各咬一口, 根本你未必會發現. 如果當時我同酒樓講, 佢地堅持係鵝, 我都告佢唔入. 唔通真係將d剩餘既鴨件, 拎去消委會告佢咩! 所以我地冇再幫襯新浦崗分店, 估唔到相隔幾年, 係另一分店又遇到不快事. 睇黎以後都唔應該再去呢個集團既酒樓食飯啦!
(The above review is the personal opinion of a user which does not represent OpenRice's point of view.)
Post