無名炭爐雞蛋仔 (Closed)

所謂無心插柳柳成蔭，發現呢檔嘢全仗太太嘅功勞...話說數星期前某日跟太太行過，太太喊肚餓，見到呢檔賣雞蛋仔及格仔餅，蛋香四溢，決定買一件格餅醫肚...一路等嘅時侯，嗅到一朕炭屎味，跟住真係見到阿哥仔夾咗幾嚿炭落個爐入面...嘩...呢次冇死lor...咬一口，蛋香盎然，花生醬、牛油及糖嘅量又夠多。人哋出面嘅格餅，只係會响餅上面加醬加糖然後夾埋佢；佢就做完呢個步驟後再將件餅再黐一pat砂糖上去，咁有乜理由唔好味呢?最貼心嘅係竟然可以order半份，啱晒胃口細嘅女仕們..食過一次後，我兩公婆好似short咗咁，有一排差唔多一星期食一至兩次...太太差唔多發夢都諗住食，次次行過附近都心思思...不過都唔係全無缺點嘅。有時人多嘅時候，因為怱忙，所以有時焗得唔夠透，個皮就會淰D...但已經係接近完美嘅格餅la...北角雞蛋仔? 太安樓雞蛋仔? 尖咀Big John ? 差太遠嘞....