喺佐敦都有一間表面上係麵店，但同時亦係非常平民又高質嘅私房菜，夠4個人就可以食到
第一味菜式，有幾款前菜。溏心蛋上鋪滿蟹籽，雙重口感又滑又爽。蝦多士唔會太厚，反而比例做得啱啱好。菌類啲醬汁好出色，非常開胃。萵筍好爽口，蒜蓉啱啱好唔會太過
跟住就係大蝦，好鬼大條又多肉，完全俾特製椒芡醬覆蓋住，但唔會太蝦，好惹味又吊到蝦嘅鮮爽，脆米餅索晒啲汁，點嚟食超好味
嚟到大胃最鍾意嘅松子魚，炸得好均勻恰當，保持到魚肉鮮嫩，連魚皮都好滑溜，松子三色椒醬汁極之醒味，一粒餸都唔想剩
本幫紅燒肉都係食到嘩嘩聲，紅燒肉可以整到肥而不膩，全是功架。燻魚唔會嚡，好嫩好香。腐皮肉厚，感覺似食緊鵝掌
胡椒湯底煮蜆，蜆肉鮮甜、湯底溫和，仲有大量瓜肉同粉絲，健康又美味，仲有啲蒜頭襯香個湯底
松子臘腸瓜菜飯，飯嘅質感偏爽口，有啲臘腸肉吊味，加上松子拌飯，口感更有層次，滿滿菜香同飯香嘅渾然一碗
