渝味曉宇重慶老火鍋 (如心廣場) (Closed)

呢度用QR code落單，清晰簡潔。上菜速度也很快，等緊水滾嘅時候，我哋已經食緊一個小食「重慶炸酥肉」，招牌菜之一，果然好味，鬆脆惹味。一般來講，打邊爐我都係鍾意食肥牛，不過今次呢個「曉宇嫩牛肉」驚喜地勝出！估佢唔到咁滑同埋咁腍，絕對推薦。另外嗰個美國優質肥牛粒反而要有啲技巧，淥得泰耐會有點韌，但淥得太短時間裏面又未熟，要好好掌握哦！呢度勝在仲有啲特別嘅食物可以叫，例如本人至愛嘅牛骨髓，滑嘟嘟好正呀！不過唔係個個喜歡。另外都有「稻田毛肚」，呢個其實係未漂白嘅牛柏葉，我鍾意佢比白色嘅牛柏葉更加爽，真係唔係度度有得食㗎。田園菜籃都有幾款菜，除普通嘅金菇、娃娃菜之外，仲有皇帝菜同一隻我都唔識嘅菜，幾好！我哋今次亦都有叫飲品，雖然佢選擇唔多，但係有啲健康啲嘅選擇例如洛神花茶或者羅漢果茶，我哋就叫咗一渣洛神花茶飲，都斟到四至五杯，酸酸味味，開胃解渴。整體嘅食物質素都好好，而且而家午市免湯底，就算要比每位醬油茶芥錢，都已經抵好多，希望遲啲有機會再嚟過。