咸菜，勁咸不甜吃不消，撈粥應該更好。不知有什麼靚海鮮，叔叔叫我行過兩條街到街市親自揀貨會更快捷更有效率，路程不需 1 分鐘無問題。
大象拔蚌刺生，連工包料 $630 蚊堅抵食。堅大大條新鮮即劏即片，脆卜卜勁鮮甜味濃，沾點青芥末豉油更提鮮。冰鎮下面夠晒凍，上面只是室溫，凍一點更吸引。
白灼黑青口，活北寄貝賣晒，伯伯推介青口。滾熱辣輕煙飄上。巨形肥嘟嘟滑溜溜，肉質超有彈性，肉汁飛射，海水咸香搭鮮甜青口肉味，無需任何調味直接品嚐，美味極致，$110 蚊值回票價。
蒜蓉粉絲蒸扇貝，珍寶裝大形扇貝，兩隻夠您飽。肉厚過熟，嫩滑欠奉，實實淨淨質地。幸好有著大量辛甜蒜蒜，淋上豉油捲埋濕潤粉絲掃入口，精華所在，熱騰騰仍是可口醇美。
特價蝦中蝦 $168，特價所以過熟？感覺一早烚熟再翻熱出場，梗係過火變老啦！鞋硬韌有齊，乾爭爭欠爽滑彈，蝦味有的，辣椒豉油靠晒您喇。
古巴蜜蜂龍蝦 2 斤刺生，本想食爽甜澳洲花龍，但魚檔哥哥們稱太細隻無咩肉食介紹古巴蜜龍，未食過我信您。白雪雪龍蝦肉比起日本伊勢海老更晶瑩剔透，微爽鮮嫩，清香甜美無限。真係甜到有蜜糖味一樣啊。
上湯焗古巴蜜蜂龍蝦伊麵，刺生完全消滅殆盡，龍蝦頭還有很多肉，不煲湯而煮個麵食吧。伊麵腍到無牙阿公阿婆都厭棄，腍劈劈烚到無晒伊麵蛋香，一啖放棄。走過油炸過的龍蝦頭更香口，香氣澎湃，食得格外滋味。蝦肉爽彈結實，索入上湯味道更甜美可口。
椒鹽瀨尿蝦皇，夠粗壯大條，雖游水但肉有點削，油溫不足煮太慢嗎？幸好瀨尿蝦天生甜味特濃，濕潤多汁，併上椒鹽蒜酥依然食得不亦樂乎。
清蒸杉斑，游水海魚邊度有得輸！黏滑的魚皮夾著厚厚魚肉，結實多汁而不失鮮嫩質感，配上蔥味豉油加魚汁，份外醇美醒神，嗆住食停不了了！頭頭尾尾被香損得乾乾淨淨，差點骨都吞埋喇，失禮晒。
蝦醬通菜鮮魷，鑊氣迫人夠精彩。鮮魷腍滑正常蠻不錯，師傅出手略重，蝦醬味太咸。通菜有澀味，又要放棄，食晒鮮魷算咯。
