駟馬拖車潮州飯店 (彩明商場) (Closed)

去將軍澳探朋友，順便食埋晚飯，佢話樓下商場開咗間冇耐嘅潮州菜唔錯，所以試吓。坐低睇吓個Menu，果然好新淨，裝修都光猛企理。諗咗一輪最後決定叫個滷水四拼盤，鹹肉炒麵線，春菜蘿蔔鹹肉煲，同埋芒果糯米卷做甜品。最先上嘅滷水拼盤有鵝肉，腎片，紅腸同五花腩。再有滷水豆腐墊底同滷水蛋。滷水味溫和醇香又唔會過鹹。鵝肉嫩滑唔鞋口。腎片同紅腸就正常。但最精彩嘅係個五花腩，除咗炆到入味之餘，肥瘦相間而咬落又唔會一口油，非常甘香，非常好味。春菜蘿蔔鹹肉煲嘅春菜其實即係芥菜，同蘿蔔鹹肉一齊炆，炆完放過夜，令到春菜更加入味。蘿蔔都係當造嘅時節，都好清甜。湯底稍微有啲鹹，但整體就係好傳統嘅潮州菜。鹹肉炒麵線其實係類似豉油王炒麵嘅質地，並唔係阿宗麵線咁幼嘅。但都炒得唔錯，一啲都唔油，有韭菜同芽菜，配埋切咗絲嘅鹹肉，炒得都有鑊氣。甜品叫咗芒果糯米卷，類似長洲出名嘅芒果糯米糍。但佢嘅餡係用咗芒果布甸再加芒果肉，所以甜味比較突出，但就少咗芒果本身小小嘅酸味。而外皮都做得好薄，雪凍食好好食。