植作茶

Open Now

Now Closed

聽朋友講山林道新開左間好特別嘅茶飲店，主打唔係平時嘅珍珠奶茶，而係養生又零咖啡因嘅穀類飲品。雖然舖位細細，不過木系裝潢都幾覺眼，放左好多乾花、稻草、相片等，配搭非常舒服。一到門口，見到Menu寫嘅材料都唔常見，例如決明子、玄米、黑豆、紅麥等等，仲手寫埋有咩功效，令我心大心細左好耐。本來想點黑豆茶，但店員話當日鮮奶系列做緊九折，就點左薏仁鮮奶（去冰無糖，原價$29，折後$26）。Menu寫薏仁鮮奶可以美白、消水腫同祛濕毒，有冇效就未知，但奶味非常香，薏仁超級足料，我估起碼有四分一杯。由於我叫無糖，薏仁係比較淡口但帶有穀物香味，好甜嘅朋友可能要叫多少少糖份啦。順便一提，店內飲管有分紙飲管同膠飲管，我無留意就攞左紙飲管，自己飲野慢，飲飲下紙飲管爛左，有少少尷尬。如果你想飲好似薏仁鮮奶之類比較足料嘅野飲，就最好唔好攞紙飲管。