麵賜園 (Closed)

麵賜園係老牌越南餐廳越興園嘅分支，一樣落戶喺旺角，主打無味精健康養生湯麵。麵嘅價錢有少少進取，不過份量非常多，好似我叫呢個牛隊長湯麵就非常大碗，面頭鋪滿餸，包括五香牛腩，澳洲和牛封門柳，西蘭花同蘿蔔，當中較出色嘅係封門柳，幾夠牛味；牛腩都夠腍，但係唔算好入味；蘿蔔夠甜夠腍，西蘭花就略為硬咗少少。麵嘅軟硬度可自選，我揀咗最硬，食嘅時候都係覺得有少少腍，所以一定要揀最硬。隨麵附送涼拌雲耳，少少酸少少辣，幾惹味；當晚仲另外送咗個焗薯蓉。較為特別嘅係呢度居然有烘焙咖啡飲，我試咗杯迷你嘅，係尼加拉瓜豆，感覺較為厚身，唔錯。食完餐飯，成晚冇扯水，證明個牛骨湯底真係冇味精👍。