日常素食 (Closed)

終於嚟到增肥12月，同唔同嘅friend食聖誕大餐、年底或新一年聚舊，餐餐都大魚大肉。講真，有時一大班friend食咩都唔係重要，最重要係見吓面！所以，今次我哋就食得健康啲，嚟到黃大仙嘅日常素食，呢度主打素菜放題，就算大食嘅朋友都會食到飽飽，又唔會有好大罪惡感啦。自助沙律吧區素食又點少得沙律呢？呢度有三色椒、紅腰豆、粟米、雜菜、唔同嘅生果等等，加上醬汁，顏色鮮艷，好清新健康呀！仲有唔少開胃小食，我就最推介酸醋雲耳，好醒胃呀！一口蘿蔔糕自家製嘅蘿蔔糕，煎得好香，而且蘿蔔份量唔少，食到絲絲嘅感覺。而因為條素食關係，當然唔會有臘腸同臘肉，唔會太油膩。天婦羅除咗中式嘅素菜，仲有日式選擇，除咗有壽司，天婦羅係我哋嘅推介。有蕃薯同茄子天婦羅，炸到脆卜卜，好好味。熱盆區熟食有超過20款選擇，店員會不斷更換菜式，最重要當然係唔好浪費。其中推介嘅有咕嚕肉，酸酸甜甜好開胃，而口感同真係幾可亂真。熟食仲有腐竹炆涼瓜、荔芋扣肉、炒菜、豆腐、五柳魚、炒粉、炒飯同點心等等，夠晒豐富。甜品作為一個晚餐，有埋甜品就相當完美。甜品有桂花糕、楊枝甘露等，但最驚喜係素食一向少見嘅雪糕。