金源 (Closed)

去青衣邨金源食晚飯，叫咗個「野菜什菇烏冬」，碗嘢嚟到只有什菇，一舊菜都冇，但明明以前食過係有好多西蘭花 (如圖)，於是我問個侍應點解冇西蘭花，佢好串咁話一向都冇，之後俾我哋chok多兩chok又話午市先有晚市冇，然後我哋話一向只會嚟食晚市，係有西蘭花嘅！之後佢走去收銀，叫個疑似係老板娘嘅女人過嚟，個女人又係重複同一番說話，然後加一句：「今次我俾返兩舊西蘭花你啦，但下次真係冇喇！」嘩，真係皇恩浩蕩呀你！我即刻火滾，同佢講係你哋個menu寫住「野菜」架喎！佢即刻冇出聲就行開咗。呢間嘢啲service一向差，成日落錯單呢啲小事我都算，諗住係黃店就算數，盡量將就下啦，但而家連做生意都咁唔老實，幾粒西蘭花都要呃人。其實如果你真係要咁小家，唔該你就唔好懶，改埋個menu，刪走「野菜」呢兩粒字啦！而家唔係你下次冇西蘭花，係我下次兼以後都唔會再嚟！#其實唔係幾粒菜嘅問題 #我食少幾粒菜唔會死#而係做生意老唔老實嘅問題 #仲要講大話話一向冇