港滋味 (Closed)

假期前夕去咗筲箕灣探朋友之後上到嚟都係屋企附近嘅呢一間餐廳度食晚餐～～～餐廳用餐環境舒適，服務員嘅態度非常之好，似係家庭式經營，好耐冇遇到服務態度咁好嘅餐廳☺️。～～～佢哋餐牌有散叫，亦都有二人餐，睇完之後我哋就叫咗一個二人B餐，再另外加多個🍍菠蘿鎮江骨。～～～二人餐裏面有新加坡式海南雞、蒜蓉開邊蒸龍蝦、台式豆酥蒸黃花魚同海菜豆腐，另外可以再加錢要白飯🍚或者油飯。～～～海南雞係用鮮雞炮製，雞有雞味，亦都唔會好肥，仲加埋兩舊雞乾同埋腎，好豐富，油飯亦都好香雞油味。～～～蒜蓉開邊蒸龍蝦🦞亦都很不錯，龍蝦蝦肉紮實，蒜香濃濃，如果可以加埋粉絲索埋啲蒜蓉汁就更加正。～～～雖然雞同埋龍蝦好食，但係台式豆酥蒸黃花魚🐟同海菜豆腐就更係驚艷所在。黃花魚大大條，配搭香口嘅豆酥同埋辣油，惹味非常，而海菜豆腐就係佢哋自家製嘅，質感類似玉子豆腐緊非常軟滑，配搭菇菌提味，健康又好食。～～～最後菠蘿鎮江骨就非常下飯，汁底香香甜甜，滲透入豬肉嘅每一寸肌里當中，不錯。