Food Combo (Closed)

之前已經食過Food Combo，一直都覺得幾好食，耐耐地又返嚟幫襯食午餐。今次叫咗All Day Breakfast 同芒果大蝦沙律，加$10仲有餐湯/沙律同飲品。All Day Breakfast 好豐富呀，有煙肉，香草腸，烤豆，黑松露炒蛋，沙律，蒜蓉多士，南瓜薯餅，我覺得香草腸同南瓜薯餅最好味，非一般嘅香腸，薯餅香脆熱辣辣，正！芒果大蝦沙律，唔使講，之前食過知道好味，所以見午餐有當然唔放過。餐湯我哋轉埋沙律，結果我哋有好多沙律食，好開心呀👍餐茶揀咗凍熱情果芒果紅茶，淡淡地啱晒我，但如果嗜甜就會嫌佢唔夠味。我哋揀咗平日十二點半就到，所以唔使等位，又坐得舒適，係午餐推介食肆之一。