倫哥火鍋私房菜 (Closed)

之前有朋友介紹依間任食火鍋，雖然部分海鮮、牛肉無得任食，不過食物質素最重要，而依個價位黎講真係唔錯，如果一大班人食就啱哂，有海鮮又有雞煲，滿足所有人要求。一坐低就有兩個前菜，可以食住等。而飲品我揀左五花茶，雖然都係偏甜，不過總好過加多寶個啲。其實我本身唔中意雞煲，因為好油膩，但係真係好香，所以都食左幾件，雞件肉質肥美，都幾惹味。店員好主動幫我地攪拌雞煲，服務唔錯。個汁好傑身，冬菇夠腍，鮑魚就比較一般。燉湯都幾清甜，唔會太多味精。湯底係蕃茄薯仔湯底，唔會太濃味搶左海鮮嘅鮮味。以下係最令我滿意嘅火鍋配料。首先係大大份海鮮拼盤，有北寄貝、蟹、蝦、蜆、蠔、貴妃蚌、象拔蚌、鯇魚片、龍躉片、花甲等。鯇魚片肉質爽脆，象拔蚌厚實彈牙，其他海鮮都好鮮甜飽滿，估唔到依個價錢都食到高質海鮮。牛肩脊大大碟夠兩個人分，而且脂肪分佈平均，食落甘香有嫩滑，肉味濃郁，不過有幾片比較瘦。右下嘅墨魚滑同蝦滑都好足料，有大大粒墨魚同蝦肉，食落鮮甜彈牙食完以上配料之後，已經飽到食唔落其他丸，所以唔好眼闊肚窄，追加太多食物做成浪費！