一幻拉麵

Open Now

Now Closed

上年去北海道已經諗住試吓新千歲機場入面嘅一幻拉面, 因為無論網上或者身邊嘅朋友都有推介呢間一幻拉面。但由於實在大排長龍再加上趕飛機最終無食到。估唔到事隔一年佢就黎香港開鋪, 襯住熱潮過咗無咁多人就去試下。夜晚9點去到, 但門口仍然有十幾人喺度排隊, 相比起之前已經唔算多人。大概等咗20分鐘就入到去, 可惜佢窗邊望到維港景嘅位已經封咗俾員工執拾緊, 所以就坐咗bar枱。叫咗碗尖沙咀店限定嘅特濃蝦汁叉燒拌面。一碗要88蚊, 可以選擇拌面配料嘅份量, 至於面嘅粗幼軟硬無記錯亦有得揀。拌面嘅汁係由蒜蓉、蝦味醬油、蝦油同埋一幻特製嘅蝦汁混合而成。面上覆蓋住蔥粒、炸蝦子、紫菜、叉燒同埋溏心蛋, 所以未拌之前唔覺得拌面嘅汁好多, 但其實食到最後會發現有汁淨。由於汁嘅量都唔少又濃味, 而面亦非常掛湯, 所以食嘅時候可能要飲多幾啖水。但整體黎講, 我覺得蝦味非常濃郁, 如果接受到比較咸嘅味道, 一定會好鐘意食。88蚊食到日本越洋黎香港開鋪嘅拉面店算係合理, 下次再黎會試埋佢另一款比較受歡迎嘅味噌蝦湯拉面。