金記冰室 (康怡廣場北座) (Closed)

今日同阿爸阿媽出街，陪佢哋去康怡廣場買完衫買完鞋，肚餓啦，見到呢間金記冰室都幾多人掛緊隊喎，一於試下呢間。等咗唔係好耐，大約5分鐘左右就到我哋。鋪頭入面都幾有港式風味，天花上面放咗幾排維他嘅膠箱，好有集體回憶。冇講咁多，叫嘢食先！我阿媽叫咗個鐵板雜扒，凍檸水；雜扒係有雞扒、豬扒、牛脷。個豬扒好嫩口，唔會太乾。老豆叫咗西冷牛扒，凍奶茶；佢碟鐵板可能特別熱，倒啲黑椒汁落去，即刻炸到成枱都係汁，但係聽到啲『喳喳』聲真係好正啊！塊牛扒仲要幾厚同大塊下，起碼一定大塊過大家樂果啲。我就一定要食飯先飽肚嘅，葡國雞飯，凍奶茶。呢個就一般啦，飯有啲乾，葡汁唔夠多。但係總括黎講佢都係好食嘅。