漁之部屋 (Closed)

講真，平時好少食放題，驚食飽後個肚又會大了一個碼。不過今日老婆突然話想食放題，見好耐無食，就就下佢啦。之前嚟過漁之部屋，抵食夾大件，又好多選擇同好味。早啲食平啲，又健康啲，所以我哋食5:30pm，兩個鐘。嘩，6:00pm就全場爆滿，真係好多人。一開始梗係食魚生先啦，款式又多又新鮮。我就覺得最好食係赤海蝦同三文魚。赤海蝦又爽又彈牙，仲好鮮甜。三文魚，就勁肥美，又厚身，啖啖肉，口感豐富。日式蟹籽沙律真係好好味，青瓜絲好爽口，沙律醬同蟹籽嘅份量都啱啱好，好正。老婆最鍾意食日本粒粒蕃薯，佢真係叫咗好多，粒粒都好甜。焗蟹殼係另一推介，熱辣辣，又好足料。呢到嘅甜品選擇好多，而且細細件，可以食多幾款。總括嚟講，二百幾價錢有咁多選擇，質素又好，真係去邊到搵，下次食放題都會再嚟呢間。