德美壽司 (新都城中心1期) (Closed)

哩間日式餐廳已經唔係第一次食，諗唔到食咩，又想食日本野既時候，都會揀佢，因為佢既性價比真係幾高，今日屋企冇飯食，所以放工之後我就自己走左嚟食。寶琳哩間分店成日都爆滿，大家想食都要早啲嚟，今次我就揀左坐吧枱前面。餐廳係用QR Code電子落單既，環保又方便。而且壽司師傅好細心，會預先問你壽司入面需唔需要放Wasabi，今次就揀左一個壽司盛盒，其實我每次黎都係揀哩個🤣🍣壽司盛盒 美 $218包括吞拿魚、油甘魚、三文魚、池魚、帆立貝、熟花竹蝦、三文魚子、鰻魚、拖羅茸卷同玉子。吞拿魚係厚切，完全無筋，非常肥美，咬兩下就接近半溶；油甘魚大塊厚切，入口充滿魚油香；三文魚係近三文魚腩既部份，新鮮肥美；池魚加左蔥花係面，癖走左啲腥味；帆立貝大粒鮮甜；熟花竹蝦非常彈牙；三文魚子新鮮大粒，份量好多，一咬落去充滿油香；鰻魚有炙燒過既香氣；拖羅茸卷加左芝麻係面，所以食落有芝麻香；而印上德字同美字既玉子好甜，亦好有特色。🍵綠茶蕨餅，質感綿軟煙韌，甜度適中，都幾好食！整體黎講，哩間壽司店既食材新鮮，價錢相宜，小編已經唔係第一次黎食，難得既係每一次黎食都唔會失望，絕對係值得一訪再訪既壽司店。