第一次黎行過附近，諗住問阿姐咖喱撈烏冬係港式定日式？
我：想問咖喱撈烏冬係港式定日式？
小梅姐：港式定日咩式呀？ 聽唔明你講乜！
小梅阿姐塊面已經好唔耐煩
我：（我以為阿姐聽唔清，我再講一次）即係港式定日式？
小梅阿姐：緊係香港啦，你以為大陸呀？！
我：哦⋯ 我唔係話大陸，日式即係日本甜咖喱
小梅姐：你呢個問題真係好難答！我唔知咖喱係咩式，我只知黃咖喱白咖喱紅咖喱，我未食過我唔識答你！
我已經唔想同佢繼續呢個話題，同埋問佢一句個樣好似得罪左佢咁黑！ 太肚餓我就冇叫咖喱叫燒汁啦⋯
好普通！普通到我覺得唔好食！真係唔值呢個價，新蒲崗大把40幾蚊好食少少🤏 食緊既時候已經諗早知去麥當勞食，個職員態度差又唔好食
做餐飲連食物既本身咁簡單問題都唔知😐我覺得員工係需要培訓囉
之後睇返OpenRice 先發現原來呢間咁多打手，差評都係鬧食身質素同職員態度差，講真想做街坊生意仲態度差好快會執笠
