嚟到棉登徑就會見到Time Park個發光logo，行落去就到達間bar。
之前睇蘋果動介紹，呢度一邊嘅裝修係inspired by london tube，另一邊就係森林風，非常特別。
睇片以為好大面積，但比想像中細。不過絕對唔迫，坐得十分cozy。
呢晚星期五多客人，我哋就被安排坐bar枱，可以睇到bartender調酒。
首先嚟嘅係飲品，一杯mocktail，一杯cocktail，賣相都十分之吸引。
Phantom ($88)
Happy hour $58/glass; Regular $88/glass
呢杯Phantom係無酒精飲品，用咗荔枝、薄荷葉、菠蘿汁、蝶豆花調制而成。
Foggy ($118)
Happy hour $78/glass; Regular $118/glass
呢杯cocktail成份就有bourbon、糖漿、蛋清、百里香。
用個flask裝住嘅係煙同lemonade。
Bartender會首先開蓋比你聞下啲煙燻味，再幫你倒少少lemonade落杯酒度。
之後就按個人喜好加入lemonade，焗得越耐煙燻味會越重。
入口有濃濃嘅煙燻味，好特別嘅一杯cocktail。
之後就到食物喇，無論係賣相、食材定整法都好特別～
Time Park 自家製蟹肉脆燒賣（$88）
呢款燒賣用到春卷皮為皮，蟹肉、蛋黃醬、魚子漬等等為餡料。
燒賣皮十分香脆，入面嘅蟹肉好鮮味，配合蛋黃醬，非常開胃。
香辣海膽汁配三文魚子豉油漬及闊條墨魚（$98）
呢道菜用作墨魚嚟切薄片，模仿闊條麵，爽口彈牙。
配上香辣海膽汁，有少少鮮味得嚟又有啲辣味，好過癮，好惹味，會令人停唔到口。
燒西班牙黑毛豬腩配蝶豆花菠蘿干邑意大利飯（$188）
面頭嘅西班牙黑毛豬腩，燒得啱啱好，味道唔錯，好似燒肉，不過略嫌脂肪有啲多。
意大利飯用到蝶豆花嚟整，所以藍藍哋色。
亦都用咗cognac，所以有酒味，而食落去就比較似糊仔…🤔
香檳慕絲朱古力布朗尼（$78）
呢碟brownie賣相亦都好不錯，brownie上面有香檳慕絲同白朱古力。
香檳慕絲cream狀，食落無咩味。
brownie比較硬身，入面有nuts，朱古力味好濃～
大約十點開始，DJ就開始播歌，客人都出去玩下beer pong，氣氛高漲，傾計都傾得開心啲！
