粉果佬 (Closed)

上次食感覺一般，因為同事未食過，所以今日俾多次機會食粉果佬。本身無諗住會寫食評，所以都無影相。燒賣-跟上次一樣，比較有質感，唔係軟淋淋果種，有人鍾意，有人唔鍾意，我個人唔鍾意淋身嘅嘢，所以覺得還可以。魚蛋-上次覺得爽口彈牙有驚喜，可惜今次好淋，唔鍾意，有啲失望。粉果-上次皮較厚餡太少，今次有驚喜，外皮煙韌，餡料有沙葛肉碎，配合得好好。今次仲試咗生菜魚肉，即叫即整，味道正常發揮。總結，粉果佬粉果自己手做，厚唔厚皮，好唔好食，好睇粉果佬心情，希望可以keep到今日嘅水準💪🏻另外，得1個姐姐負責整食物同收錢，真係做到傻，搞到要等好耐，所以要有定心理準備要排隊慢慢等。