焱手工涮涮鍋 (Closed)

同朋友行旺角行到攰攰地，天寒地凍，見就腳試下入呢間，打個邊爐，取取暖。齊齊食梗係揀套餐抵，鍋底好多款，揀到眼花花，最後決定清酒煮蜆鍋 + 雪山飛龍 + 人蔘湯鍋。鍋底到左，色澤好、配料足，鍋底各有風味，味道香濃，而且入面真係撈到幾條人蔘。落左食物，等鍋底滾既期間，先食前菜柚子沙律同鮑撈起手撕雞。細細份幾開胃。跟住就到重頭戲海鮮拼盤，右起有蝦、帶子、魚片，下面有冰塊夠凍，中間的龍躉肉肥美，滾一陣就食得，入口滑嫩，配埋鍋底好鮮甜除左海鮮仲有手工拼盤，黑松露豚肉餃子、鮮蝦棒、太極鮮冬菇有釀餡料，非常獨特。手工安格斯牛丸辣辣地，好惹味。打邊爐當然唔少得牛肉，套餐包左安格斯牛頸脊，雪花均勻分佈，肉同膏相間，口感十分好。松板黑豚肉擺得相當別緻，小小支架撐起，淨係望住已經食欲十足。最後以一個椰汁冰做終結。最後埋單每人$300，價錢合理，可以同時食到安格斯牛、海鮮拼盤、黑豚肉，而且湯底亦非常加分。下一次經過旺角油麻地，可以再考慮。