每當想食日式放題🇯🇵，我第一時間就會諗起「極尚大瀛喜」。觀塘店我仲食過起碼五六次，因為同屋企人成日去。
12
呢晚放工過到嚟九點，時間啱啱好，可以食宵夜時段😜，每位$268。其實只要唔太細食嘅話，基本上我覺得都抵食，因為居酒屋閑閑哋都呢個價。
我哋前後嗌咗兩轉嘢食，上菜速度合理，亦無漏單👍。食物賣相大致上都吸引，而且份量適中，唔會用澱粉質塞飽你。
由於我哋鍾意食飯，所以主攻壽司🍣，而唔係刺身。首先嚟一份自製三文魚盛盒，包括鹽燒三文魚腩、三文魚腩以及京蔥煙三文魚。幾款各有特色，不分高下。另外，再加芝士鰻魚玉子燒，呢度嘅玉子菜式比較少，多啲就好。
其他壽司款式包括火炙蒜香牛肉、蒜香牛油大蝦以及鹽燒左口魚邊。🦐大蝦新鮮好食，肉質彈牙。左口魚有啲失望，因為帶唔出魚油香。
卷物方面，我哋嗌咗牛油果加洲卷、辣味三文魚卷同鵝肝壽司。🌶辣味三文魚嘅辛辣好惹味，醒神開胃。鵝肝好細嚿，非入口即化嗰種。
迷你多士好的骰🍞，麵包本身都唔錯，富牛油香、烘至微微脆，兩款口味分別為牛油果煙三文魚同龍蝦沙律伴櫻花蝦，佢哋唔乾身，啱晒配多士。
跟住就嚟到熱食部份，我認為全部都好食，兼且係新鮮熱辣辣整起🔥，絕對唔會因為係任食而變咗劣食。殿堂宴客醉鮑魚同埋牛油翠玉瓜串燒係全晚最值得推介，同埋我哋Encore咗幾次。酒釀鮑魚超入味🤤，酒味濃而不烈，質感好軟稔，而且鮑魚都算大隻。翠玉瓜燒完都仲好多汁。
鐵板蜜汁蒜香牛柳粒，🥩牛柳粒好正，有咬口得嚟唔韌。每粒蘸滿蒜香蜜汁，好惹味；伴旁仲有三色椒同洋蔥一齊炒香。
燒紐西蘭香草羊鞍同鹽燒牛舌亦同樣出色，兩款肉質軟嫩，而且火侯同生熟度控制得宜🍖。羊鞍唔會太羶，而牛舌又有一定厚度，抵讚。
1
每次嚟都必食壽喜燒牛肉鍋🍲，湯底充滿醬油甜香，飲完都唔覺口乾。牛肉片同娃娃菜係膽，兩樣都吸盡壽喜燒精華，而底部更墊有少量薯粉。
呢度天婦羅都有得食🍤，我每樣嗌咗件，包括虎蝦、皇帝蟹棒、南瓜同蕃薯仔。天婦羅即叫即炸，炸皮又鬆又薄，蝦同蟹棒都並非頹貨。
食到最後當然唔少得甜品，其實佢有成個蛋糕櫃，但已經太飽，所以淨係食咗扭扭雪糕🍦。抹茶味同朱古力味都好濃郁，而且質感唔會太稀，並可DIY加配料，啱晒貪玩嘅小朋友。
飲品選擇亦係花多眼亂🍵，我比較鍾意佢嘅自家冷泡茶，無糖飲落消滯。
餐廳嘅自取食物區面積幾大，所提供嘅菜式都幾多元化，包括小食、前菜、熟食、湯同炸物等🍢。雖然味道無乜驚喜，不過有得好似酒店自助餐咁拎嘢食都開心嘅。
總括嚟講，極尚大瀛喜保持一貫水準😁，放題質素之中佢算好好，食物款式同味道均令人滿意。餐廳現時採用QR code落單，唔使再搣紙畫紙，方便好多。佢嘅餐牌定期會更新，就例如連近期大熱嘅酸菜魚都有得食！
