稻香 (紅磡廣場)

Open Now

Now Closed

Item: Tao Heung (Hunghom Square)
Rating: 2
Author: 奧志雷

Tao Heung (Hunghom Square)

3.5

42 Reviews

Taste

Decor

Service

Hygiene

Value

1157

Hung Hom

$101-200

Guangdong Hot Pot Dim Sum Dim Sum Restaurant Salt & Sugar Reduction Restaurant

Info:
Restaurant:	Tao Heung (Hunghom Square)

To promote a new salt and sugar reduction (RSS) dietary culture and living style to the people of Hong Kong, the Environment and Ecology Bureau, the Committee on Reduction of Salt and Sugar in Food and the Centre for Food Safety of the Food and Environmental Hygiene Department have launched the "Less-Salt-and-Sugar Restaurants Scheme" ("Scheme"). Restaurants participated in the Scheme will offer less salt or sugar options to the consumer or even tailor-make less salt or sugar dishes in designated restaurants. Participating restaurants will be granted with the Scheme Labels for displaying in the premises for public identification. For details, please click here: https://www.eeb.gov.hk/food/en/committees/crss/restaurants.html

奧志雷

Level4

2.1K

Read full review

海鷗一路好走喇，打住 3 號波同事們聚聚食餐解穢茶啦！本來想去美味金御架，不過落雨大家唔想行太遠，最緊要大家高興！琴晚打 10 號風球橫風橫雨，李家誠趕住開市，十點多就連 8 號風球都除埋，大家又迫車迫人趕返公司，點解朋友公司咁好可以 lunch 後先回公司，而我地就要立即飛返公司呢 ﹗條氣唔那順，怨氣極之重，成班同事一齊去飲個靚茶鬆鬆去先。

依然高掛 3 號風球，嘆個非常豐富既午巿早餐先，不幸地有點肚痛食得唔多添。一起身已經有點肚痛，似係腸胃炎，夜晚還要跟同事們晚飯呢，希望無咩大礙吧 ﹗同事生日飯局，順便餞行同事返美國再加迎新茶聚，歡迎河上鄉侯小姐加盟 ﹗一圍變兩圍，突然暴升到 16個位食家出席，消滅五十個點心濕濕碎啦 ﹗

有段時間無 lunch 飲茶咯，醉雞鍋只需 $1蚊雞，真的嗎？回想早前大埔稻香嚴重中伏，醉雞鍋打邊爐比隻甩頭甩骨仲要無皮既雞我，好似垃圾桶拿上黎一樣，散發強烈隔夜嗅雞味 ﹗依家還猶有餘悸呀，認真怕怕。依個孖寶龍蝦餐非常十分之好很吸引喎 ﹗而且加多 $1 蚊送燒味併盤添，好似好抵食咁，試過先知喇。

原粒燒賣皇，即叫即蒸，滾熱辣送到，一開噴煙，好鬼興奮打冷震呀 ﹗索一索舒筋活絡，空氣中充滿鮮蝦豬肉香味，口水流不停，殺呀﹗燒賣係我最愛點心表中穩佔首位，甜美啖啖肉，結實不鬆散，豬甜蝦鮮交替嘴嚼，每啖都發出幸福的聲音啊。

馬拉卷，其實應該同馬拉糕一樣架喎，但何解味道及質地都相距甚遠呢？卷較硬較淡口，唔好食既。糯米卷，兒時的回憶，可能含糯米飯甜甜地，加上麵包香噴噴，不過依家一年都未必會食到一次。微暖的糯米卷，糯米已被甜豉油完全滲透程淺啡色，散發清新甜味，不濁不嗆不過份，剛剛好。沒有什麼配料，只有幾粒花生，真的有點單調。麵包香氣及味道又不及當年，整體不過不失，作為填飽肚功能係可以的。

鬼馬油條，鯪魚肉釀油炸鬼之麻，我還以為會用蝦膠添。硬掘掘又無味，強差人意，試一次便夠。旋風叉燒包，見到到旋風，只見到菊花。包皮比普通既結實及油膩，不過餡料特別少的呢？麻麻地。

乾炒牛河，我不要蔥、不要韮黃、不要芽菜，食前準備功夫特別多，揀呀揀、揀呀揀，完成 ﹗乾炒牛河全走，河粉都炒得不錯，完整不斷不散又不會黐埋一束束，顏色都撈得夠均勻。可惜味道有點濁，老抽多了一點點，整體味道還不錯。

豉汁蒸鳳爪，重口味濃濃豉汁將腳指包到實一實，不過一於好少理，整隻炸爪塞入口，大力一啜，應聲骨肉分離﹗雞皮爽爽蓋著彈彈筋肉，甜甜的醬汁雖然有點油膩，如溫度夠熱會好一點，幸好味道始終還不錯呢，加上軟骨咬到卜卜聲，食得更過癮。

豚肉腸粉，仲以為什麼豚肉腸粉新出品，點知係梅菜肉鬆囉，不過食落幾有趣，算您啦。豬肉滑潺潺，醃味濃濃混上梅菜，出奇地可口。其實餡料也不少，再多一點就更加開心啦 ﹗百搭梅菜肉餅，蒸飯又得，做腸粉又得，得左。

陳醋雲耳，陳醋酸味夠濃，十分開胃，入口室溫爽爽的。家鄉咸水角，鬆化嚥韌，肉碎甜美，不過一壓咇油，噴射四踐，食一舊夠喇。椒鹽豆腐粒，炸得金黃鬆脆，色澤鮮明，薄薄的一層脆皮包著勁滑白豆腐，淡淡豆香撞上濃味椒鹽真的天衣無縫。

酥炸魷魚鬚，雖然炸粉有點厚又油淋淋，幸好依然香脆鬆化，味道調得可口甜美，魷魚鮮味出眾，嚥韌帶彈滑，沾上喼汁好食好食。每次必食首選，但經常無跟埋喼汁上菜呢，要另外問侍應先有囉。

煎釀鴛鴦椒，油到滴出黎呀 ﹗翻炸索滿油再放在碟上，非常驚嚇，照食可也 ﹗紅青尖椒爽甜不，尖位微辣夠刺激，淋上熟油及甜豉油作點綴，擺脫單調的感覺。食到滿口油淋淋，非常油潤，整個嘴仔郎過油，只食到油味及微辣，no good ﹗

腐皮卷，炸到油淋淋，不過鬆脆又香口。將瘦肉、蝦仁、木耳塞得滿滿，幾好食喎。但要揀出韮黃囉，好嗅呀﹗入口就想反胃，我食唔到的。蒸雙丸，濃烈的宿味，還帶著突出的腥味，什麼來頭呀？

蒜蓉蒸土魷，沒有味道的雪藏土魷非常需要大量蒜蓉辣椒提味呢﹗混出香辣惹味的汁液，但土魷不爽彈而鞋韌，蒸過火了。反而墊底粉絲最好食，不過又散又碎扣晒分啦。

蒜蓉蒸排骨，豉椒就經常食，蒜蓉就好少酒樓有做喇，轉下新口味先。排骨蒸到一咬就散，腍劈劈，質地麻麻，仲要唔熱油淋淋，蒜味就認真濃烈喇。潮州粉果，我只吃大埔新明發的粉果，因為清爽不油膩，餡料香甜，而且無蔥無芹菜無芫茜呢﹗稻香有芫茜呢，果皮太油淋淋不喜歡。

稻香鮮蝦餃，完全跟銅鑼灣曉廚軒無得比，天淵之別。一夾爆開，厚厚的餃皮彈性不足，蒸到過晒火而程半溶狀態，食落跟鮮蝦粉腸一模一樣，非常有趣又特別喎 ﹗幸好蝦仁還是鮮爽的。

燒腩仔，跟橙色芥辣？甜而不辣既？蛋黃醬來的嗎？化皮脆而不硬，咬落不散，讚 ﹗薄薄皮下脂肪添著咸香嫩肉，每口都發放肉汁，難得的高質，真的要食多兩件呢。

燒鵝例牌，皮脆肉嫩，正呀 ﹗竟然會是脆皮，係有點肥，但不過份，少少肥膏可以咬掉。白滑鵝肉醃味清爽，但不夠濃郁，質素達標，不過可以更好。鮑片粥，粥底淡而無味，而且鮑片腥腥地又腍劈劈，即刻狂加胡椒粉，添點豉油好多了，免強食晒。

鴛鴦炒飯，紅白汁都麻麻地喎，茄汁肉絲併白汁蝦球，另一種撈汁風味。我唔食洋蔥架，所以茄汁無得食，食兩啖洋蔥味太霸道，吃不消。白汁忌兼味濃厚而黏黏，明蝦球巨形但欠鮮爽，不過不失，都食得下既。

鬆軟叉燒包，都係略厭包皮鬆軟度不足又有點偏乾呢，皮厚餡少，雖然半肥瘦蜜汁叉燒餡香甜濕潤，但份量太少了，完全淹沒在包皮味道之下 ﹗懷舊鵪鶉蛋燒賣，肉球勁多肥豬肉喇，雖然會香口一點，但過於油膩，甜甜的混上鵪鶉蛋，味道不俗。

響鈴蝦腸粉，炸得太燶，油膩感超強，不清爽鬆化，添上甜豉油夾著鮮蝦仁味道還可以，食得過。欖菜肉鬆炒飯，竟然最差會係您囉 ﹗飯粒嚥韌，不過太多油，落味不足，過淡口，感受不到鑊氣，失敗。第一次食欖菜炒飯係灣仔東方小祇園齋菜，震憾的色香味美，沒有被我挑剔的空間啊 ﹗

韮菜餃，沒有煎過的蒸餃喎，濕濕呢。幸好味道比預期中滿意，淨韮菜沒有蝦沒有肉，菜汁豐富香甜味濃，爽爽的每口水潤，餃皮黏黏嚥韌，不錯喎。

醬皇金錢肚，由厚厚醬汁牢牢緊鎖看守著，濃濁杰撻撻一舊舊，唔熱就更加嚴重﹗金錢肚先彈後軟棉，但被咸咸芡汁所拖累，麻麻地。鴛鴦雙潮，兩粒蝦餃併兩粒粉果，我極討厭此味雙併點心，每次都蒸的餃皮溶溶爛爛，我寧願各叫一籠蝦餃及粉果囉。

北菇棉花雞，熱辣辣香噴噴，啖啖都係肉，唔洗損骨又唔洗淪骨真方便。硬淨而滑的雞柳大大舊甜美可口，軟軟微爽的魚肚海棉體索盡精華，爆汁水潤好好味啊 ﹗最後來片彈滑味濃北菇作結尾，滿足 ﹗

豉椒蒸排骨，半骨半肉，肥膏也不少，豉椒可口惹味，醃味就一般喇，香甜差一截。滑滑腍劈劈的瘦肉黏著肥騰騰的脂肪，整碟都油淋淋，真的肥左少少喎。

奶皇包，雖不是流沙奶皇包，但奶味香濃幼滑，而且熱騰騰出晒煙，包皮比叉燒包鬆軟，手感一流，大力搾搾充滿彈性又暖笠笠，真的愛不釋手呢。

皮蛋瘦肉粥，厚厚黏稠的粥底，粗糙一粒粒，清淡的雞湯味再淋上豉油及胡椒粉就好味多了 ﹗硬硬的皮蛋並未給粥底溶化，加上幾絲乾硬肉條，味道還算合格。

XO 醬炒蘿蔔糕，夾著微辣瑤柱蝦米 XO 醬特別香口，淡淡的蘿蔔味但不見蘿蔔絲，點些混醬甜而不辣，有趣的味道。蒸蘿蔔糕，濕濕黏糊的蘿蔔糕，半溶似漿的狀態特別燙嘴呢 ﹗蘿蔔味道比炒蘿蔔糕更突出，不過調味過淡，淋點豉油較好。

剁椒蒸魚頭，骨杉杉的沒有肉的魚頭啊，過下口癮，損損骨、舔舔汁還可以，辣辣的味道使到微微冒汗，爽乎。臘味糯米飯，不能掩飾蒸完再撈豉油的味道及質感，臘味太少不夠香口，油油的味道單調，一試無妨。

時蔬牛肉球，巨形香滑肉球，夠熱又夠嫩，鮮牛味道突出，齋食有點寡，一定要配上大量喼汁，醒神開胃幾好食，如果加入檸檬葉就更清香喇。白灼生菜，淋上淡豉油，簡單清甜爽嫩多汁，係烚得黃了一點點，而且凍得非常快啊。灼鯪魚球一樣轉眼變凍了，質地實淨，泛著魚腥味，普通淡豉油不能殺掉這味道，有辣椒豉油就更好喇。

甜醋豬腳薑，我一向都不吃的，就隨便試兩啖吧。不夠酸又不夠甜亦不夠薑，油膩感重，味道陰沉不清香，豬皮爽爽的，豬肉有咬口，平凡的質素。炸蝦春卷，蝦在那啊？細到食唔到，淋上喼汁脆卜卜又酸咪咪都食得過癮既。苦瓜排骨，驚喜的可口喎，苦苦甘甘的又爽爽滑滑的，排骨味濁，又肥又油，骨多肉少，麻麻地。

雷沙湯丸，不吃甜的我竟然要對付雷沙湯丸，好啦好啦。熱騰騰的粉團外層滑潺潺裡面嚥韌水潤，滾上大量砂糖及花生碎，又不是想像中的那麼甜，可以接受。

福建炒飯，除揚州炒飯外，福建炒飯同樣係我至愛，因為料多又啖啖肉之麻。有菜有肉又有蛋，有蛋香有鑊氣，飯粒乾爽又嚥韌，晒發著美味咸香，好食到一停掃入口啦 ﹗

蜜汁叉燒，乾乾硬硬，太咸不甜，食不到蜜汁味又食不到焦香，配白飯可能會好食一點。咸菜胡椒豬肚，個湯完全唔熱又那會好飲啊 ﹗湯汁咸而胡椒味薄弱，豬肚彈彈不苦澀，很悶的一道菜色。

蠔汁鮮竹卷，蠔沖芡汁甜美，濃濃的厚厚的包著啖啖肉鮮竹卷，整條豪氣地塞人口，不讓半點肉汁、半點精華流失 ﹗在裡面爆開，正呀 ﹗煎蝦米腸，煎完帶著焦香，當然特別香口，只是腸粉本身不滑溜，結實的身軀麻麻的，沾上甜辣醬都唔難食既。

炸兩，我一向都唔鍾意食炸兩的呢，油炸鬼堅脆卜卜，滑滑黏黏粉皮包住，點上甜醬辣醬齊齊趙，合格啦。白灼菜芯，沒有天然菜甜味，不夠爽嫩，味道及質素都接受既。

櫻花蝦蒸雞飯，有創意幾特別喎。超級驚喜價 $3.8 有蒸飯食，份量就只有平時的 3 份 1 囉，依個價錢當然要縮水啦，不過一定夠飽既，抵食！味道跟咸魚肉餅十足十，份子料理？哈哈。

剁椒蒸三寶，油豆腐居然勁好食，熱辣辣的香口外皮，裡面豆腐勁滑又濕潤，推介。青椒及茄子也不錯，先煎後蒸再撈上剁椒，香辣無比。炸素餃，似足腐皮卷，都不知道有什麼分別。千絲蘿蔔酥，不喜歡的炸物，甜甜的、油油的、蘿蔔味濃濃的。

榴蓮年糕，食不出風味來，似榴蓮香蕉糕，濃濃的榴蓮味，不感興趣。蜆蚧鯪魚球，真的嗎？沒有蜆蚧的蜆蚧鯪魚球？要叫外叫侍應提供的？真係一頭霧水喎。當普通炸鯪魚球，已縮水又縐皮，外層咸咸的又嚥嚥韌韌，過過口癮唔難食。煎薑汁糕，焦香熱辣辣，外脆內黏，甜甜的味道泛著微量薑汁味。

稻香 (紅磡廣場) Open Now Now Closed

稻香 (紅磡廣場)

Open Now

Now Closed