Texas Burger (Closed)

位於天后嘅Texas burger已經冇咗，想食到德州漢堡就唯有嚟朗豪坊。呢一間唔係開咗好耐，佢嘅位置係喺平時有人表演唱歌嗰個舞台隔離，我去嗰日咁岩冇人表演，所以亦都冇人圍觀。但如果有人表演，就可以一路食burger，一路聽住live Band，都幾有格調，當然大前提係要live Band好聽啦。我哋叫咗一個凱撒沙律。美國香濃車打芝士牛肉漢堡，跟套餐同埋奶昔。跟套餐會包咗粗薯條同埋酸瓜，另外根據你叫唔同嘅嘢飲就會唔同嘅價錢，我就揀咗是日奶昔，奶昔係香蕉曲奇味，係我最愛嘅香蕉味，而且係餐牌上面冇嘅，淨係跟餐先可以飲。個漢堡包都幾厚，唔可以用快餐店嘅同佢相比，因為你真係要撳扁少少個包先至可以擺得晒落口。另外，車打芝士半溶嘅狀態，加埋佢嘅醬汁，仲有牛肉嘅肉汁，真係好好味。香蕉奶昔嘅香蕉味非常之突出，如果餐牌可以恆常提供就好啦。