睇個名就知道又係川菜又有粵菜
個名幾特別穿越時光 一定會記得
幾鍾意去v point食嘢
因為有海景 淨係睇個景都一流
今次特登早幾日打黎book枱
希望坐喺近海景位
餐廳都好好咁幫我哋安排 環境都幾靚
叫咗三款涼菜
蒜泥拍青瓜
涼拌海蜇雲耳
酸辣魚皮
其中酸辣魚皮 幾特別
用咗泡椒同埋小米辣椒
所以酸酸地又辣辣地
魚皮又超級爽口彈牙
幾出色
黃金椰菜花
原來係用鹹蛋黃作為調料
鹹蛋黃包住晒椰菜花
每粒椰菜花都有鹹蛋黃嘅鹹香
非常之惹味 另外鹹蛋黃起沙真係好香
酸辣鱸魚
其實即係酸菜魚
酸味較重
由於朋友唔係太食得辣
特登揀咗小辣 鱸魚非常之嫩滑
食完一片又一片 另外入邊都有啲薯粉
兩個人來講份量都幾大幾飽肚
食完啲鹹鹹辣辣嘅嘢梗係要食少少甜品同埋解辣啦
我哋就叫咗紅糖冰粉
冰粉同出邊比較唔一樣 係整碎咗變成一粒粒
估唔到呢個口感都幾好喎 同埋落咗啲紅糖
甜甜地好解辣
