最大目標係麻辣鴨血，但其他都好多野想食呢 ﹗叫多點叫多點，我會打包返屋企，不浪費的。款款鍋底都想試，麻辣、酸菜、寧神、薑母、美人、養生，教我如何是好呢，擲骰仔決定？
麻辣鍋小辣，麻辣鍋其實我愛食中辣的呢。小辣也不錯，微辣帶著香料甜甜的餘韻，豐富的香料，溫和的刺激。美人鍋有桃膠，我以前成日以為係花膠溶到黐埋一舊舊囉，真係大鄉里孤陋寡聞啊，要進修一下。仲有烏雞、杞子、南棗、金華火腿、等等。滾開急不及待飲碗，夠香夠濃，有燉湯的影子，厚厚黏黏的湯汁特別美味。
養生鍋，美女稱好怕人蔘既甘苦味道都願意捨命陪我一試，感激不盡。用藥材、人蔘、火腿、老雞、瘦肉餚製而成，甘甜蔘味強烈，加上清香藥材味道，美味絕倫，我非常喜歡。但美女完全受不了，食唔到養生鍋，只能食麻辣鍋，真係十分抱歉啊。
滷水鴨舌，乾乾瘦瘦欠肥美欠爽彈欠嫩滑，感覺似雪死左不夠新鮮，滷水味都較平凡。我要食新鮮雞子架，為何來了鴨舌？可能侍應姐姐入錯單咯，雞子叫做雞佛？第一次聽，有趣喎。鹽酥蚵仔，鹽香炸瘦猛猛蠔仔，乾爭爭不鮮不甜無蠔汁，掉落火鍋烚一烚、吸吸湯，變得好食左喎，哈哈。
雷式混醬，只需要青蔥、生蒜、指天椒較晒，簡單就是美，最衰無炸蒜啦 ﹗對我來說食火鍋最最最緊要就係指天椒，如果無指天椒，我真係連火鍋都唔想食呢。
翠絲水蓮，繼早前食過羽衣甘藍後又一有趣台菜，十分新奇啊。真係唔用絞剪唔得，試過想用手撕斷，估您唔到會完全唔成功，好得意喎。長食長有，長到藤蔓一樣，顏色翠綠如寶石一般，大束大束地入口，爽脆又多汁，清新的菜味非常特別，比羽衣甘藍好味道。
手切牛肉細，拖兩拖粉紅滑溜溜品嚐，牛味突出，香甜肉汁輕滲，Good ﹗可以再厚多兩公分，更有咬口又更多肉汁。餃子併盤，極品水餃、韮菜餃、魚皮餃、鮮蝦雲吞、麻辣牛肉餃，水蓮餃，每款兩粒最適合我這類貪食鬼 ﹗排得骨子整齊，靚靚仔仔送上。
韮菜餃、水蓮餃，菜多多塞到脹卜卜，滑滑的餃皮包著爽爽嫩菜，菜汁澎湃鮮甜到拍爛手掌，無得輸。極品水餃、鮮蝦雲吞，頂上靚餃渾圓肥嘟嘟，超足料無搵笨。大大粒塞入口，蝦仁又爽又甜，豬肉彈滑不腥，整粒結實不散，質地一流。魚皮餃、麻辣牛肉餃，相比下較平凡普通，不過不失。
手功丸類併盤，鵝肝墨魚丸、黑松露蝦丸、芝士牛肉丸、墨魚丸、蝦丸、梅菜豬肉丸， 兩行一字排開讓我檢閱一下，粒粒大細平均，水潤閃令令，嗅得到的新鮮。您好野粒粒彈牙鮮味出眾無可挑剔，唯獨梅菜豬肉丸既餡可以多一點。
最搞笑係掉晒落麻辣湯染到全部深紅色，完全分唔開那款打那款，不知道遇上什麼丸，食既時候驚喜萬分 ﹗蟹子墨魚滑，跟手打墨丸一樣，鮮味非凡，彈滑無比，肉多粉少勁足料。
野生竹笙，爽脆大條又完整。味道淡淡的，索湯高手，全部味道靠晒湯底。幾乎每次火鍋都必食，比山根、魚皮、響鈴更愛。
鴨血，一定梗係要配麻辣湯啦 ﹗不要急，要耐心等候，烚到麻辣湯完全滲透其中，嫩滑無比，一咬瀑汁
﹗豬紅跟她完全無得比，鮮甜滑嘟嘟香噴噴，散發一絲的麻辣味道，熱騰騰出晒煙地咬，越食就越想食，不能自拔，實在太美味喇﹗千層凍豆腐，潛藏在麻辣鍋底下，鬆軟的豆皮似海棉似蛋糕，吸盡麻辣湯汁，湯汁邊食邊噴，可口刺激。
烏雞，從美人鍋裡救上來的 ﹗幾萬個為什麼？何解煲湯雞能如此彈滑香甜，鮮嫩美味？滑嘟嘟的漆黑雞皮，藏著緊緻雞肉，滲出肉汁跟湯汁，點解呢？全部被我消滅，連骨頭都損得乾乾淨淨﹗
鮮冬菇，out of menu 特別 order 淨冬菇。雖然菇菌類快熟，但我喜歡烚到廿十倍熟，吸盡湯汁彈彈滑潺潺，成粒滾熱辣啪入，爆開全是湯汁，菇味濃郁而清爽，感覺非常暢快﹗
七星鱸魚，只得一款厚條，無得揀就照食啦。立即聯想到我打緊既 PS4 game 太空戰士，係海邊狂釣巨形七星鱸好鬼興奮呢﹗背脊肉微微結實，有點偏腍。薄薄魚肚肉少少滑少少膠，不苦不澀。魚味淡而陰沉欠鮮甜欠魚甜，味道非常單調，不喜歡。
蟶子皇，呎碼大大碌都唔細條喎，洗得乾淨白雪雪，一氣呵成掉晒落去，食左先講。必須全神貫注，睇準時機，一脫殼即起，否則太熟變硬似食橡膠。烚得剛剛好，海鮮甜味橫掃所有食材，爽彈的肉質不容置疑，頂級享受。
新鮮雞佛，有緣自然食到您喇 ﹗小心翼翼地烚，不要烚過火，不能烚到穿，如果烚爆使到所有肉汁流失變得乾爭爭就唔好食架。靜候片刻，得左﹗完整沒有破損又彈力十足的鮮雞子呀，閃令令發晒光﹗咬破脆皮，燙燙的汁液飛射，鮮甜到震，蛋香吸引，質地膶膶幼滑，食到停不了呀﹗
紫淮山麵，最怕腍劈劈的麵條，淮山味道怪的，不是我杯茶，試一次便夠。非常富豐的晚餐，預左食唔晒，打包返屋企無問題，之後幾晚都靠晒佢喇。高水準的演繹實在難得，服務及環境都合格，讚。
1
