緬甸招牌湯米線 (Closed)

呢間位於何文田嘅小店 － 緬甸招牌湯米線，主打少見嘅緬甸菜，繁忙時間勝利道總店成日都要排隊，所以喺窩打老道都開咗第二分店，一於試試！聽講老闆娘係緬甸華僑，所以會間唔時就返緬甸入一啲食材返嚟，味道夠晒正宗。黃薑脆脆雞翼外脆內軟嘅雞翼，配上極香嘅黃薑粉，好好味！酸辣雞絲米線配上紅腸同豬皮嘅酸辣雞絲米線，同出面嘅酸辣米線味道唔同，湯色較深，味道濃郁又特別，酸味似用咗鎮江醋，好醒胃！不過份量就略嫌較少。曼德勒紅燒腩肉配飯由緬甸買貨再自家製醬汁，味道有啲似東坡肉，但又無咗嗰種肥膩感！肥瘦分明嘅紅燒腩肉索晒，肉已經入晒自家製醬汁，好入味，撈飯一流！