六和素食 (Closed)

壽星仔生日揀食素，咁我哋一行八人就去咗灣仔鵝頸橋底嘅六和素食先嚟幾個小食打頭陣。桂花蓮藕片，淡淡桂花清甜味，藕片夠脆，不俗。芝蔴手撕鷄，呢個素嘅手撕鷄用炸嘅烹調方式，食落口感同平時嘅手撕鷄完全唔同。香芒吉列卷，賣相精緻。川味抄手餃子，一般水準之作。奇味豆腐，口感特到，醬汁滋味，值得一試。菱角豆腐餃，賣相精緻到不得了，但餃子size亦細到不得了，食唔出是甚麼材料同味道，反而一旁嘅蒸蛋白好好味。牛油果焗法包，熱辣辣上枱，香脆好滋味。冰梅盤龍蒸茄子，真係期望越大越失望…，外形仿如一條豬大腸，茄子亦唔入味，我個人絶唔會推介。蜜桃香酥骨，賣相不俗，合格之作。豉油王炒麵反而係令人驚喜之作。呢個石鍋素腊腸炒飯亦相當出色。總括而言，呢度食品質素唔錯，價錢都算合理，對於食素嘅朋友嚟講，確一個不俗嘅選擇。