一起果醬 (Closed)

今日同朋友嚟到呢間以果醬為題嘅餐廳。首先當然要試下招牌果醬多士啦。厚多士分成9格, 每格塗上不同口味嘅果醬, 果醬唔係死甜, 入面夾雜咗粒粒果肉, 帶點果香味。是日餐湯 - 羅宋湯, 加入多種蔬菜, 有紅腰豆、甘荀、青瓜、椰菜等等, 又好味又健康。新鮮沙律菜同酸酸甜甜嘅果醬一拍即合。以後自己整沙律可以試下以果醬取代蛋黃醬啦。單骨雞翼外層除咗帶點焦香, 仲帶有蘋果醬嘅甜味, 令人食完又再食, 停唔到口。野菌同黑松露嘅香氣迷人, 意大利飯軟硬適中, 份量頗大。肋骨間豬肉夠曬腍, 又入味, 就連骨頭都好香。熱辣辣嘅薯角, 點士多啤梨醬食, 你又試過未呢？感覺有啲似瑞典肉丸點果醬, 又唔錯喎。平凡嘅紅茶加上自選玫瑰蘋果醬, 飲落仲有玫瑰花瓣同少少果粒, 好飲又夠特色。最後連今晚嘅甜品, 芝士蛋糕同樣唔少得果醬伴碟, 夠曬sweet。