滿串自家醃制串燒店 (Closed)

呢間喺深水埗嘅串燒店🍢勁唔起眼，我成日行嚟行去搵嘢食都見佢唔到，可能因為舖面較黑較低調，而且行過都可能以為係齋賣串燒～但同事食過晏所以就提議試吓。可能中午啱啱開舖無耐，所以冷氣唔係好夠😅。店舖細細，但擺咗幾張枱都算坐得舒服👍🏻，而女店員好積極同街坊講午市有飯食㗎。不過落單時佢講話豬扒、雞扒同金菇肥牛都無😅😅😅，好彩我係一開始已經揀咗岩鹽燒牛仔骨飯($52+$4綠茶)，如果唔係就掃興了。上碟時發現比想像中好，因為我有諗過佢會唔會全部用哂即棄餐具上，點知係成份便當🍱咁，碟牛仔骨大大碟有好多嚿，又有大碗飯，仲有啲泡菜做前菜同個湯仔👍🏻👍🏻。味道都幾唔錯，鹽燒🧂味恰到好處，唯一缺點係有一兩嚿牛較肥或有啲韌。飯煮到啱啱好有飯香，絕對唔係冷飯，泡菜少少地辣好啱送飯，如果多啲就好，而個湯仔有少少似忌廉湯🤔，唔記得咗，但總之幾好飲。最搞笑係每個餐都會有2粒腸仔做餸🤣。另外2個同事就分別叫咗鹽燒鯖魚飯($48)同香草燒羊架飯($68)，我無試到，所以唔知味道如何，但都係大大份嘅。有機會嘅話都可能試吓其他串燒，但前提係佢要有貨🤣🤣🤣，lunch絕對可以encore，性價比還好👍🏻。