雖然呢度嘅窗口位可以見到海景，不過我哋就揀咗坐吧枱，因為可以欣賞到師傅為客人燒串燒嘅過程。
午市套餐主打都係串燒，另外都有刺身、壽司、烏冬等等嘅選擇。
3
經理仲好好請我哋食枝豆，粒粒都飽滿而且翠綠，豆殼外邊平均地灑上海鹽，食起上嚟好惹味。
套餐先來一道前菜，店員介紹食物嘅時候仲建議我哋進食嘅先後次序，先食南瓜🎃，然後麻醬豆腐沙律🥗，最後就係蕃茄伴柚子醋凍🍅。我尤其鍾意呢個蕃茄，佢係去咗皮，雪得凍凍，加埋醋啫喱，成件事都好透心涼！
然後就輪到幸串燒盛合出場。串燒包括有和牛舌🐮、黑豚長葱燒🐷、手羽先🐤、華味鳥雞腿肉🐔、大蝦🦐、蘆筍🥬、同埋精選野菌🍄，另外仲有溫泉蛋🥚作頭盤，自家漬物係牛蒡同青瓜🥒，仲有麵豉湯同白飯。
串燒做得好出色，我最鍾意兩隻大蝦燒得脆脆，可以整隻蝦由頭到尾連殼食晒，一啲都唔嘥嘢，而且真係好香口好好味！
雖然呢度主打食串燒，不過都想繽紛啲，所以就叫咗刺身丼🍱，刺身方面包括有拖羅、劍魚腩、帆立貝、牡丹蝦同三文魚籽，另外都有配溫泉蛋、漬物同麵豉湯。拖羅入口即溶而且非常肥美，其餘嘅刺身亦都新鮮而且鮮甜，口感一流。
雖然已經每人食咗一個套餐，但仍然係意猶未盡，始終一場嚟到當然要再食吓串燒至夠大滿足！一於食好啲，叫多幾款串燒食吓！
先來呢個和牛串🥩，雖然份量唔多，但真係燒得好好味，和牛嘅油脂分布平均，師傅控制火候亦相當出色，做到外面香脆，入面剛剛達至七成熟，仲見到有少少粉嫩嘅肉質，口感同味道都一流！
見到師傅為其他客人燒緊帆立貝🐟好吸引，同吧枱職員傾談間知道係每日新鮮入貨，所以我哋又要咗一客，師傅應該加入咗少許牛油，仲有一啲菇類，帆立貝燒得剛剛好唔會過熟，仍然保持鮮味，又係一款值得推介嘅燒物。
老公鍾意食蠔🦪，所以亦都叫咗一客燒蠔，蠔嘅肉質肥美飽滿，放入口感覺脹卜卜，加咗調味之後仍食到蠔嘅海水鮮味，好正！
燒士多啤梨🍓串其實喺呢度嘅特色推介，因為見到佢門外牆身嘅介紹都係用咗呢個燒士多啤梨串做賣點，做法係在士多啤梨🍓外面包咗一層薄薄嘅豚肉，再將士多啤梨🍓燒到又暖又軟身之後，就點少許煉奶一齊食，呢個做法果然令你對食士多啤梨有更深層次嘅享受！所以呢個一定要試！
1
老公對海鮮類零瀉情有獨鍾，於是乎就叫咗燒多春魚🐟，頭尾燒得香脆，而內裏嘅肉質就仍然嫩滑唔會燒得太乾身，老公就好鍾意食。
喺用膳期間，店員都會走過來同食客傾吓偈，問問食客嘅意見，服務真係非常一流👍🏼，讓你真係願意喺呢度繼續開心消費。其實仲有好多款串燒都好想試，但實在太飽了，唯有下次再嚟食過！😋
