馮濤泰菜 (Closed)

今次同朋友試咗間位於深水埗嘅一間泰菜。餐廳位置有少少隔涉，但一入到去餐廳就覺得幾有氣氛，燈光暗暗哋加埋裏面嘅裝飾有少少bar 嘅feel。而座位方面都幾闊落，坐得幾舒服。食物方便我哋嗌咗一飯三餸，分別嗌咗菠蘿炒飯，青檸盲鰽魚，春卷同埋店員推介嘅鐵板蠔仔蛋。先講前菜小食春卷。春卷味道正正常常，但勝在夠熱辣辣又夠脆。而魚同蠔蛋都有驚喜。盲鰽魚成條上，啖啖肉，配埋香料同埋青檸，又酸又辣勁惹味。聽店員講係用新鮮青檸汁整出嚟。而且魚肉幾嫩滑，零腥味，真係幾唔錯。而蠔仔蛋更加喺上菜已經驚艷到我。份量大到好似座山咁，加上擺喺鐵板上面，放低就已經聞到好香蛋味。食落覺得蠔仔都幾多下，隻隻都又肥又大，零腥味。同店員比埋特製嘅辣醬一齊食，真心食到停唔到，一陣已經食晒。最後菠蘿炒飯就冇乜特別，普普通通，都算係一個唔錯嘅菠蘿炒飯。嘢飲方面我哋嗌咗椰汁冰同埋泰式菊花茶。泰式菊花茶原來要配埋花奶飲，第一次飲都幾特別。兩杯飲品都幾大杯，幾足料。總結一下，以泰菜嚟講呢度嘅食物份量都算係大，味道亦都唔錯，特別覺得盲鰽魚同蠔仔蛋非常之好食，推薦大家來深水埗嘅時候不妨一試。