翠河餐廳 (Closed)

本人食過好多間「翠」字頭嘅餐廳, 印象中都係唔太好受嘅。經過旺角亞皆老街上海街交界嘅「翠河餐廳」門口個下午茶餐牌見到有「讚岐烏冬」呢幾個字, 好吸引, 咁就吸咗我入去食。呢度餐廳環境其實幾舒適嘅, 玻璃窗可以望到出面街景, 見到好多遊客, 喺朗豪坊行嚟行去, 熙來攘往。餐廳服務員態度幾好, 服務到位、有禮貌。我叫咗個<豬軟骨讚岐烏冬> 湯底應該係一般「潮州粉麵湯底」, 但食落都唔錯, 配襯得到。作為烏冬嘅湯底, 幾特別。烏冬質地煙煙靭靭, 我估佢就算唔係真正嘅讚岐烏冬, 都扮得好似, 好接近嘅貨色, 唔係一般好平好平嗰啲「噹噹」貨。豬軟骨份量充足, 炆得好好味(柱侯味), 肉的部分淋, 軟骨嘅部分爽脆。<熱奶茶> 亦都出色, 茶味香濃, 茶身幼滑, 厚薄適中。呢間餐廳有個缺點: 就係上去一樓條樓梯又斜、又窄、又唔乾淨。