逸之燒 (Closed)

上次去雞地食飯經過見到呢間店，之前都有同事提過好好食，心思思一直想試，今晩終於約到朋友一齊食啦。可能我六點就去到，眼見未有其他客人，既然食評都話ok，唔理咁多叫嘢食先，有個疑似老闆娘嘅人過黎介紹食物同落單，唔太hard sell幾有禮貌嘅。首先黎個二人刺身拼盤，二百零蚊我覺得物有所值。帶子夠厚肉仲要勁鮮甜，三款魚刺身都好肥美，咬落口有好濃嘅魚油香味。蝦刺身啲肉好爽甜架。鮑魚好有咬口。仲有海膽，勁甘香，所以我即刻追加多碟金箔海膽帶子。呢碟仲更加不得了，舊帶子大到呢。食完刺身就隊咗一輪串燒，叫咗豬腩肉、牛舌、安格斯牛肉、鷄皮、雞軟骨、鰻魚、牛肉露筍，再燒帶子同燒蠔。燒物最出色係雞皮，勁脆的！未夠喉再叫埋軟殼蟹手卷，軟殻蟹手卷好足料，香口又唔油。今晩真係大滿足，臨走前比我發現見到原來有皇帝蟹宴，即係代表好快又會再黎呢度食好西啦。