貴州牛花溪牛肉米線包包 (Closed)

係旺角女人街街口附近見到有間新既米線店開左，作為米線愛好者，當然立即去試試。坐低店員就比左餐牌我地，睇一睇，價錢都唔平，不過睇相睇落都唔差。我地點左佢店既主打，花溪牛肉麵、貴州燃麵同埋南翔小籠包。不過店內樓面只有一人，落單有d慢，還可接受！首先黎到既係貴州燃麵，本來睇佢個麵超乾身冇太汁，感覺味道會冇味，但食落有意想唔到既好惹味，花生同埋炸蒜配加佢既醬油，惹味又唔會太咸，仲帶點甜味。隨麵會送上一個湯，係紅蘿白湯，清甜好似有落糖咁。之後黎既係牛肉麵，麵底同燃麵一樣，但因為有湯浸住，麵質變得太淋，食起黎唔夠爽口，不過湯底夠重牛肉味，加左幾滴秘製辣椒油，令湯底更惹味，跟燃麵比較，個人比較喜歡前者。最後既係南翔小籠包，皮厚薄不一，可見係全人手製，可惜薄皮易穿，小籠包肉汁夠多，味道唔錯！總結黎講，價值比幾高，以小店水平黎講算係高汁之選！推薦！