川婆婆 (寶勒巷) (Closed)

隨意係尖沙咀搵左間餐廳黎食，食之前都已經上openrice 睇過下啲食評，點知都係中伏。　　開始先黎口水雞，雞肉鞋口，份量尚可接受，但係個辣油相當唔錯，裡面既青瓜清新得黎又香辣，非常送飯。　　小龍蝦一上枱賣相吸引，雖然只係叫左細份，但係隻碟勁大，加埋睇落好多蝦咁，真係食指大動，點知一食就知出事。係人都知小龍蝦淨係得個頭大，肉係比較少，但係川婆婆既小龍蝦啲肉真係細到喊，條肉得２／３mm粗，完全係攝牙罅，我懷疑成碟小龍蝦既肉拆哂出黎既份量係唔夠正常人一啖，而且蝦肉完全唔新鮮，無鮮味不特止，口感又實又鞋，係好劣質既急凍貨，雪到蝦肉都縮晒。我覺得作為一個店家，呢碟嘢加埋一賣300蚊係非常過份，食水太深。　　香辣烤鱸魚係ＯＫ，但魚有炸過，已經冇乜鮮味，湯底平平無奇，食到最尾淨返個鹹字。　　最後呢餐兩個人三碟餸食七百幾蚊，完全唔值，絕對係近年最伏既一次用餐經驗。