雲貴川風味 (西洋菜南街) (Closed)

係旺角行街行到8點左右，開始搵野食。原本想同男朋友食譚X，但男朋友行街時候食左野唔太餓，所以放棄心愛譚X，打算係附近搵搵有咩食。我始終想食米線，行到譚X隔離再隔離既呢間，見到靜靜地冇乜人，打算試下啦～點知原來會係咁囉！！！坐低見到有落單紙，格式同食車仔麵差唔多，我揀左麻辣米線走肉碎走酸菜加雞肉金菇小辣，男朋友本來打算食個小食，後尾都係決定叫左碗小鍋米線麻辣湯底加麻辣豬耳豆卜。邊寫邊望望四周圍，間鋪真係好少人，水靜鵝飛，老闆娘好似唔係老闆娘，唔識招呼客人，連位都唔帶，D客人入到黎，佢淨係講左句：「坐呀」就做自己野。。。。我開始覺得伏伏地。。。好啦，碗野黎啦，睇落D湯同埋陣香味都ok架，可以勾起我既食慾。。。點知食左第一啖，忍唔住哇左聲！！！好難食！！！！D米線口感完全唔係米線，太淋，又潺，好似擺左幾日就舊米線咁。。。D雞肉好老，味道差，我腌得仲好食過佢！！！D湯飲落唔麻唔辣，似煲左好耐咁。。。我男朋友雖然冇出聲，但佢同我一樣食左幾啖就停曬手。。。反而佢果碗既豆卜就算正常。。。我明白點解呢間鋪可以係紅日晚飯時段水靜鵝飛啦！！明曬！！！呢種食左等於冇食，餓住出黎搵第2樣野食既感覺真係唔好受！