夢工房西日料理 (Closed)

今日去左葵芳地鐵站隔離食一間叫夢工房既放題，價錢都系$180左右，加多$78仲可以任食生蠔同松葉蟹，當然食盡佢啦！食物都真係有好多，淨系點菜紙都有超過10張，分開唔同種類，應該都唔會食得晒。主打松葉蟹梗系要第一時間食，食幾多隻蟹腳任你寫，都比得足。蟹腳新鮮，殼又唔會太硬，唔會太難剪開。望落以為同蟹束差唔多？甘就錯喇，蟹腳超級鮮甜而且好多肉汁，同果啲包裝蟹柳簡直系天與地之分別。另外刺身都唔錯，雖然我地把大部份精力都放係生蠔同松葉蟹，但都叫返碟刺身試下。甜蝦鮮甜，size算系大隻而且都幾厚肉既。三文魚都幾好食，味鮮有魚味，但又唔係話好突出囉。焗蠔有兩款，分別係蒜香焗蠔同埋芝士焗蠔，芝士落左煙肉，加埋表面金黃色既咸芝士，都幾香口惹味，但係蒜香就冇甘膩，而且蒜味幾香濃，比芝士更加惹味。呢度連西式扒類都有，但我都係食左羊架同牛舌Only，羊架好大隻，脂肪比例較高，亦有足夠羊羶味，雖然唔係好高級果啲，但都算係唔錯架喇。牛舌都係，雖然食得出唔係優質牛舌，冇咩爽口彈牙既質感，但係大大塊又煎得幾香口，都食得出係有牛味既，所以我自己都食左5塊有多。