半島漁港/阿翁火鍋館

Open Now

Now Closed

喂，同老友打邊爐最怕俾人催交枱㗎嘛！阿翁火鍋館就有任飲任食仲要無限時，可以慢慢食慢慢傾。食材新鮮到冇朋友，抵讚！間舖分開中菜同火鍋區，自成一角。燈火通明，坐得舒服又夠闊落！爐都未滾，伙記就送嚟兩碟「前戲」！刺身拼盤有四款刺身，都有擺盤裝飾㗎，三文魚腩夠肥美。另一碟蠔皇鮑魚同鮑汁扣鵝掌，炆得幾入味，即刻胃口大開！海鮮拼盤有墨魚、龍躉、生蠔、帶子、蟶子、青口、鮮蝦，鋪到成座山咁，睇見都開心！當中嗰隻巨型生蠔，就算淥熟咗都係好大隻，又嫩滑。叫咗個冬瓜瑤柱窩清一清！放啲海鮮落去，嘖嘖... 個種鮮甜，真係「鮮味無窮」！超大隻嘅至尊水餃皇，咬落爆汁！重頭戲嚟喇！阿翁極級牛頸，牛肉味濃，又甜又軟腍！配料任點，當中鱔片超級新鮮爽脆仲帶咬口，必點！甜品有任食陳皮紅豆沙，起晒沙，正呀！自助區啲蔬菜、丸餃、脆魚皮、爽鵝腸任攞，飲品櫃任隊！計番條數性價比真高。