套餐共有154品可以用app任點任食，估唔到除咗燒肉，仲有幾多海鮮同熟食可以揀，比起某些大型連鎖燒肉店，仲多種類！
一次過點咗4款呢個餐先有的肉，M8和牛牛板腱，M8和牛封門柳，極品牛小排和伊比利亞黑毛豬肋條。2款M8的牛都唔錯，我就幾鍾意和牛牛板腱，係牛隻肩膀入邊最嫩嘅位，油花豐富有dd筋，更有口感！朋友就鍾意和牛封門柳因為較鬆軟，牛肉味比較濃厚！極品牛小排就比較多油花，薄嫩。
伊比利亞黑毛豬肋條原來都幾爽口，唔講都唔覺得係豬！
呢個餐最正係有得嗌大大隻嘅車海老蝦，燒到2邊橙黃色，勁爽口！原隻魷魚筒都好彈牙！當然唔少得有燒生蠔同北海道帆立貝。味醂魚乾燒完都好好食！試過以上，都覺得值得嗌最貴呢個餐！
無限追加項目仲有唔少的小食冷盤，竟然仲有海蜇和風沙律！啱曬食完熱辣辣燒肉嘅我涼一涼。小食我哋試了炸雞，章魚小丸子和炸芝士年糕，三樣質素都幾高，最重要係新鮮熱辣辣炸起！亦都要讚下啲甜品，雖然選擇唔多，但我嗌的芝士蛋糕，榴槤糯米糍和西米椰汁糕，味道都幾唔錯！
臨走每人仲會有一杯Movenpick雪糕，真係大滿足。
欣賞呢間放題上菜好快，基本上我一落完單轉頭就會嚟，冇咩漏單嘅情況！同埋個app好好會提我哋仲有幾多剩餘時間可以點菜，所以我哋可以更好咁控制點菜時間同份量。整體嚟講，燒肉海鮮小食甜品服務質素都幾好，環境都幾寬敞，我覺得呢個價錢的性價比都幾高！會再嚟食！
